علاقائی رابطیاں دے فروغ نال معاشی اتے تجارتی شعبے اچ انقلاب امسی، وزیراعظم شہباز شریف دا ریجنل ٹرانسپورٹ منسٹرز کانفرنس دی چھیکڑی نشست توں خطاب

اسلام آباد۔24اکتوبر (اے پی پی) وزیراعظم محمد شہباز شریف ݙو پاسہ اتے علاقائی رابطیاں دی اہمیت تے زور ݙیندیں ہوئیں آکھیا جو علاقائی رابطیں دے فروغ نال معاشی اتے تجارتی شعبے اچ انقلاب امسی۔  زمانہ قدیم توں اساݙا خطہ معاشی اتے تجارتی راہداری رہیے، ودھدی ہوئی معاشی اہمیت ایں قدیم گزرگاہ دی اہمیت کوں دوگنا کر ݙتے، پاکستان سی پیک دے ݒہلے مرحلے اچ داخل تھیندا پئے ، ٹرانس افغان ریلوے اتے اسلام آباد، تہران، استنبول راہداری سَمیت ریلوے کنیکٹیویٹی تے وی کَم تھیندا پئے، ڈیجیٹل دور اچ رابطے ڈیٹا، اختراع اتے ٹیکنالوجی تئیں پھیل ڳئن۔ اے ڳالھیں انہاں جمعہ کوں ایتھاں ریجنل ٹرانسپورٹ منسٹرز کانفرنس دی اختتامی نشست توں خطاب کریندیں ہوئیں کیتا۔ کانفرنس اچ 20 توں ودھ ملکاں دے مندوبین شرکت کیتی۔ وفاقی وزیر اطلاعات ونشریات عطاء اللہ تارڑ، وفاقی وزیر مواصلات عبدالعلیم خان اتے وفاقی وزیر ریلوے محمد حنیف عباسی وی ایں موقع تے موجود ہن۔ وزیراعظم پاکستان دی حکومت اتے عوام ولوں دنیا بھر توں آئے مہماناں اتے مندوبین دا شکریہ ادا کریندیں ہوئیں آکھیا جو پاکستان کیتے ایں نہایت اہم کانفرنس دی میزبانی انتہائی اہمیت دی حامل اے، اے کانفرنس ایجھے ویلھے تھیندی پئی اے جݙاں دنیا بھر اچ ٹرانسپورٹ اتے رابطیاں دا منظرنامہ بدلدا پئے۔ وزیراعظم آکھیا جو صدیاں توں اساݙی سرزمین، جیہڑی ہݨ پاکستان سݙویندی اے، رابطیاں دا ذریعہ اتے اہم گزرگاہ رہی اے، اساں ایں درخشاں ادوار دی کہانیاں سُݨین جݙاں اے خطہ درجناں ملکاں وچال سامان تجارت، ثقافتی روایات اتے تخلیقی خیالات دے تبادلے دا ذریعہ ہا، قدیم شاہراہ ریشم توں ڳھن تے اج دے بیلٹ اینڈ روڈ انیشی ایٹو تئیں اساݙا خطہ ہمیشہ توں رابطیاں اتے مواقع دی سرزمین رہیے، اڄ بدلدے جغرافیائی سیاسی حالات اتے معیشت دی ودھدی ہوئی اہمیت ایں قدیم راہداری اچ نویں روح پھونک ݙتی اے جِتھ ماضی دے ہک تاریخی ورثے کوں اساݙے مستقبل دی ہک اسٹریٹجک لوڑ اچ بدل ݙتے۔ وزیراعظم آکھیا جو اساݙا بحیرہ عرب اتے خلیج فارس دے گرم پاݨیاں توں ڳھن تے قراقرم اتے ہمالیہ دے وݙے پہاڑاں اتے وادی سندھ دے وسیع میداناں تے مشتمل خطہ چین، یوریشیائی زمینی راہداری اتے مشرقِ وسطیٰ دے سنگم تے واقع اے، اے ہک منفرد مرکز اے جیہڑا چین، وسطی ایشیا اتے مشرقِ وسطیٰ دی معاشی راہداریاں کوں ݙیوے۔ پاکستان دی ساحلی پٹی جِتھ گوادر اتے کراچی دی بندرگاہاں سَمندر کوں شاہراہِ ریشم نال جڑیندن۔ وزیراعظم یاد ݙیوایا جو سابق وزیراعظم اتے میݙا قائد محمد نواز شریف ہمیشہ ایں ڳالھ تے یقین رکھیندن جو امن اتے ترقی ہک ݙوجھے نال جُڑے ہوئین، جون 2013 اچ وزیراعظم منتخب تھیوݨ دے فوری بعد انہاں دے پہلے قدماں اچوں ہک، چین پاکستان اقتصادی راہداری (سی پیک) دے معاہدے تے دستخط ہا جیہڑا صدر شی جن پنگ دے بیلٹ اینڈ روڈ انیشی ایٹو دا فلیگ شپ منصوبہ اے، سی پیک خطے کیتے ہک انقلابی منصوبہ ثابت تھیا جِتھ چین، وسطی ایشیا، جنوبی ایشیا اتے مشرقِ وسطیٰ وچال منڈیاں اتے عوام کوں ݙتے۔ وزیراعظم آکھیا جو گوادر بندرگاہ کوں چین دے صوبہ سنکیانگ نال جوڑ تے انہاں تجارت اتے توانائی کیتے تعاون دے نویں رستے کھول ݙتن جیہڑے رابطے، مواقع اتے ثقافتی تبادلے دا ہک اہم ذریعہ ٻݨ ڳئن۔ انہاں آکھیا جو میکوں اے ݙسیندیں ہوئیں فخر تھیندا پئے جو سی پیک دے پہلے مرحلے دی کامیابی دے بعد ہݨ اساں سی پیک دے ݙوجھے مرحلے اچ داخل تھیندے پئیوں جیہڑا بزنس ٹو بزنس شراکت داریاں کوں فروغ ݙیوݨ، چینی کمپنیاں کیتے پاکستان اچ سرمایہ کاری دے مواقع ودھاوݨ اتے آپسی خوشحالی دے نویں دور دا آغاز ثابت تھیسی۔  انہاں ایں یقین دا اظہار کیتا جو اے وݙے منصوبے خطے دے ملکاں دی معاشی طاقت کوں یکجا کر تے تجارت، معاشی تعاون اتے توانائی دے اشتراک دے ہک نویں دور دا آغاز ٻݨیسن۔ وزیراعظم آکھیا جو اڄ دے ڈیجیٹل دور اچ رابطے صرف سڑکاں، ریلوے اتے ہوائی رستیاں تئیں محدود نئی رہیے، اے ڈیٹا، اختراع اتے ٹیکنالوجی تئیں کھنڈ ڳئن، انہاں شرکا کوں دعوت ݙتی جو اساں سارے رَل تے تعاون دے بیج رہوں تاںجو اساڈی آوݨ آلیاں نسلاں ترقی اتے خوشحالی دے پھل حاصل کر سڳن۔ ایں موقع تے وفاقی وزیر مواصلات عبدالعلیم خان نے آکھیا جو ریجنل ٹرانسپورٹ منسٹرز کانفرنس علاقائی رابطے ودھاوݨ کیتے اساݙے سانجھے عزم دی عکاسی کریندی اے۔ انہاں آکھیا جو پاکستان خطے اچ رابطے اتے معاشی ترقی کیتے کوشاں اے، علاقائی تجارت اچ ودھارا خطے دی ترقی کیتے ناگزیر اے، کانفرنس رابطیاں دے فروغ دے حوالے نال ڳالھ مہاڑ دا اہم موقع فراہم کیتے۔