جیل اچ ملاقات سازشاں کیتے کائینی، قانونی امور کیتے اے، غیر قانونی ڈیمانڈ پوری نا کیتی ویسی، عطاء اللہ تارڑ

اسلام آباد۔ ۱ دسمبر(اے پی پی) وفاقی وزیر اطلاعات و نشریات عطاء اللہ تارڑ آکھیے جو مسلم لیگ (ن) دے قائد محمد نواز شریف اتے شہید بے نظیر بھٹو ملک کیتے میثاق جمہوریت کیتا، جیندے بعد سیاسی عمل بحال تھیا، اساں پی ٹی آئی دور دیاں سختیاں برداشت کیتن، جیل اچ ملاقات سازشاں کیتے کائینی، قانونی امور کیتے اے، غیر قانونی ڈیمانڈ پوری نا کیتی ویسی۔ قومی اسمبلی اچ الیندے وفاقی وزیر اطلاعات آکھیا جو پی ٹی آئی رہنما علی محمد خان دی تحقیق چنڳی ہوندی اے، انہاں دیاں تقریراں توں اساں ٻہوں کڄھ سکھیے جو پارلیمانی عمل کوں کیویں اڳوں ودھاوݨے، ہݨ وی انہاں پاکستان دا جھنݙا اپݨے سینے تے لایا ہویا اے، انہاں دی ٻہوں قدر اے، پر اے سلیکٹو میموری کیوں اے؟ علی محمد خان جیل اچ ملاقات دا ذکر کیتا ڳئے پر اے کیوں نی ݙسایا ڳیا جو انہاں دے لیڈر ٻاہرلے ملک کھڑے تھی تے آھدن جو ”میں انہاں دا اے سی لہوا ݙیساں، میں شاہد خاقان عباسی کوں جیل اچ ݙتا۔“ عطاء اللہ تارڑ، علی محمد خان دے پڑھے ڳئے شعر دے جواب وچ شعر پڑھیا: انہاں آکھیا جو چادر اتے چاردیواری دے تقدس کوں پامال کرݨ دی ریت وی انہاں دے دور اچ پاتی ڳئی ہئی۔ انہاں آکھیا جو ساݙی پیپلز پارٹی نال سیاسی تلخی ضرور رہی اے پر اوندے باوجود محمد نواز شریف اتے شہید محترمہ بے نظیر بھٹو رَل تے میثاق جمہوریت کیتا، جیندے بعد ملک اچ جمہوری عمل بحال تھیا۔ وفاقی وزیر اطلاعات آکھیا جو اساں پی ٹی آئی دور دیاں تلخیاں برداشت کیتن، کہیں آکھیا ہئی جو فلاں دی ٻھیݨ دھی کوں گرفتار کر تے جیل اچ سٹ ݙیو؟ کون ہا ڄئیں سویل شام گرفتاریاں دیاں فہرستاں منڳیاں؟ اے او لوک ہن جیڑھے واری واری جیل انتظامیہ توں پچھدے ہن جو کہیں کوں کھاݨا تاں نئیں مل ڳیا، کوئی دوائی تاں نئیں ݙتی ڳئی۔ انہاں آکھیا جو اڄ بدنام زمانہ شہزاد اکبر اتھاں موجود کائینی، اساں اوں ویلھے وی آھدے ہاسے جو اینڄھے بندیاں سیاسی ماحول اچ کشیدگیاں پیدا کیتن اتے ایہے لوک ساریاں توں پہلے ملک توں ٻھڄ ویندن، جݙاں جو سختیاں ݙوجھیاں کوں برداشت کرݨیاں پوسن اتے اڄ اے ڳالھ سچ ثابت تھیندی پئی اے۔ وفاقی وزیر اطلاعات آکھیا جݙݨ اے لوک تلخیاں کوں ہوا ݙیندے پئے ہن اتے پارلیمنٹ دے ادارے تے حملہ آور تھئے، اوں ویلھے اپوزیشن دی پوری قطار جیل اچ بند ہائی، جݙاں جو وزیراعظم ہاؤس دے اندرو روزانہ اجلاس ہوندے ہن۔ انہاں آکھیا جو جیل اچ ملاقات دا مقصد قانونی مشاورت ہوندے، اے نئیں ہوندا جو افواج پاکستان دے خلاف گالھ کرݨ آلے کوں تھپکی ݙتی ونڄے، نہ ای ایںدا مقصد اے ہوندے جو ملکی اداریاں کوں بھارت دے ٹی وی چینلز تے ٻیہہ تے بدنام کیتا ونڄے۔ انہاں آکھیا جو جیل اچ ملاقات ایں کیتے نئیں ہوندی جو شہداء دی تضحیک کیتی ونڄے یا سوشل میڈیا تے فوج اتے قومی سلامتی دے اداریاں دے خلاف مہم چلائی ونڄے۔ انہاں آکھیا جو جیل اچ ملاقات دا مینوئل موجود اے، ایں کیتے غیر قانونی ڈیمانڈ کݙاہیں پوری نا تھیسی۔