پاکستان خطے اچ ہک سٹریٹجک حب دے طور تے اہم کردار ادا کریندا پئے، وفاقی وزیر پروفیسر احسن اقبال

اسلام آباد۔2 دسمبر (اے پی پی) وفاقی وزیر منصوبہ بندی، ترقی تے اصلاحات و خصوصی اقدامات پروفیسر احسن اقبال آکھیا جو پاکستان خطے اچ ہک سٹریٹجک حب دے طور تے اہم کردار ادا کریندا پئے، جیڑھا چین، وسطی ایشیا، جنوبی ایشیا اتے عالمی منڈیاں کوں رلیندے۔ منگل کوں پروفیسر احسن اقبال وسطی ایشیا اقتصادی تعاون دے آغاز تے تھیوݨ آلے تیانشان فورم اچ خطے اچ اقتصادی یکجہتی اتے رابطہ کاری کوں ودھاوݨ کیتے چار اہم فریم ورک پیش کیتے۔ او چار فریم ورک اے ہن ،جوائنٹ ٹاسک فورس برائے رابطہ کاری و اقتصادی انضمام – ریلوے، بندرگاہاں اتے ڈیجیٹل تجارتی نظام کوں رلاوݨ کیتے۔ ریجنل اسپیشل اکنامک زونز – صنعتی ترقی اتے سرمایہ کاری کوں ودھاوݨ کیتے۔ یوریشین انرجی اتے گرین ٹرانزیشن پارٹنرشپ – قابل تجدید توانائی اتے موسمیاتی مضبوط بنیادی ڈھانچے کیتے بجلی دے تبادلے اچ تعاون۔ ڈیجیٹل سلک روڈ اتے فیوچر اسکلز الائنس – نینگراں کوں بااختیار بݨاوݨ، جدت اتے علم تے مبنی معیشت کوں ودھاوݨ کیتے۔ پروفیسر احسن اقبال آکھیا جو پاک چین اقتصادی راہداری (CPEC) خطے اچ معاشی اتے سماجی ترقی دے نویں موقع ݙتن، جئیں اچ قومی گرڈ اچ 8,000 میگاواٹ وادھا، 1,000 کلومیٹر توں ودھ جدید شاہراہاں دی تعمیر، گوادر پورٹ دی فعال کاری، اتے ڈیجیٹل انفراسٹرکچر دے قیام اچ اہم کردار شامل اے۔