پاکستان اچ سیاحت دے ٻہوں موقعے موجود ہن، ملک دے چنڳے تشخص کوں عالمی سطح تے اجاگر کرݨ دی لوڑھ اے، عطاء اللہ تارڑ

اسلام آباد۔ 2 دسمبر (اے پی پی) وفاقی وزیر اطلاعات و نشریات عطاء اللہ تارڑ پاکستان دے مثبت تشخص کوں عالمی سطح تے اٻھارݨ دی لوڑ تے زور ݙیندے آکھیے جو پاکستان اچ سیاحت دے ودھ موقعے موجود ہن، پاکستان کولو قدیم گندھارا تہذیب، نانگا پربت اَتے براڈ پیک جھئیں سوھݨے مقام ہین، ساݙے کولو دنیا کوں سݨاوݨ کیتے شاندار کہانی اے، ساکوں صرف ایکوں صحیح لوکاں تئیں ٹھیک طریقے نال ݙساوݨے تے پچاوݨے۔ اے ڳالھ انہاں منگل کوں ہک مقامی ہوٹل اچ ڈسکور پاکستان ولوں”نیشنل ٹورازم ایوارڈز 2025ء“ دی تقریب نال خطاب اچ آکھی۔ وفاقی وزیر آکھیا جو پاکستان ہک پورا پیکیج اے، جتھاں دنیا دے 14 اُچے پہاڑاں اِچوں پنج اُچے پہاڑ کے ٹو، نانگا پربت، گاشر بروم ون اَتے ٹو اَتے براڈ پیک موجود ہن۔ انہاں مالم جبہ دی اسکی سلوپس اَتے شندور پولو فیسٹیول دا وی ݙسایا جیڑھا 3 ہزار میٹر توں ودھ اُچائی تے تھیندے۔ انہاں آکھیا جو قدرتی حسن دے علاوہ پاکستان ثقافتی ورثے نال مالامال اے، جتھاں گندھارا تہذیب اَتے صدیاں پراݨیاں روایتاں موجود ہن جیڑھیاں اج وی کیلاش قبیلے دے لوک اپنائے ہوئن۔ انہاں ڈسکور پاکستان دے سی ای او دا شکریہ ادا کیتا اَتے آکھیا جو بیرون ملک رہݨ پاروں مَیکوں پتا اے جو پاکستان بارے غلط فہمیاں صرف اینڄھی کوششاں نال دور کیتیاں ونڄ سڳدیاں ہین، غیر ملکی سیاح ہک واری پاکستان آندے ہن تاں ول ول آندے ہن اَتے پاکستانی مہمان نوازی دے مداح ہین۔ انہاں آکھیا جو حکومت نے وزیراعظم شہباز شریف، صدر آصف علی زرداری اَتے فیلڈ مارشل سید عاصم منیر دی قیادت اچ سفارتی کامیابیاں نال ٻہوں عزت حاصل کیتی اے۔ وفاقی وزیر ڈسکور پاکستان دے پلیٹ فارم کوں عالمی سطح تے گھن ونڄݨ کیتے ہک ورکنگ گروپ بݨاوݨ دی تجویز ݙتی، اَتے ایہہ وی آکھیا جو دفتر خارجہ اَتے بیرون ملک پریس اتاشی برانڈ ایمبیسیڈرز دا کم کرݨ۔ انہاں چنڳے تشخص کیتے انگلش زبان اچ چینل لانچ کرݨ تے حکومتی مراعات ݙیوݨ دی پیشکش وی کیتی۔