صحافیاں دے حقوق دے تحفظ کیتے قومی کمیشن قائم تھی ڳئے، پی آر اے دے پلیٹ فارم توں صحافیاں دے حقوق دے تحفظ کیتے مشوریاں دا خیرمقدم کریسوں، عطاء اللہ تارڑ

اسلام آباد۔ 3 دسمبر (اے پی پی) وفاقی وزیر اطلاعات تے نشریات عطاء اللہ تارڑ آکھیا جو صحافیاں دے حقوق دی راکھی کیتے قومی کمیشن قائم تھی ڳئی اَتے پی آر اے دے پلیٹ فارم توں صحافیاں دے حقوق دے تحفظ کیتے مشوریاں دا خیرمقدم کریسوں۔ اے گالھ انہاں پارلیمانی رپورٹرز ایسوسی ایشن دے نویں منتخب تھیوݨ آلے عہدے داراں دی حلف چاوݨ دی تقریب نال خطاب کریندیں ہوئیں آکھی ۔ وفاقی وزیر اطلاعات نویں منتخب تھیوݨ آلے عہدےداراں کوں مبارکباد ڈیندیں ہوئیں آکھیا جو پی آر اے نال ہمیشہ رشتہ رہیے اَتے پریس گیلری ایوان دا ہک لازمی انگ سمجھی ویندی اَے۔ انہاں آکھیا جو پی آر اے ہمیشہ قومی، سماجی اَتے صحافتی مسئلیاں تے توانا اَتے فعال آواز دے طور تے سامݨے آئی اَے۔ صحافی جݙاں واک آؤٹ کریندن تاں انہاں کوں اوہی عزت اَتے پروٹوکول مِلدا اَے جیڑھا جو کہیں ایوان دے رُکن کوں ملدے، اے ہک انوکھا اعزاز اَے۔ انہاں پی آر اے کوں پارلیمانی عمل اَتے پارلیمانی جمہوری نظام دا مضبوط انگ قرار ݙتا اَتے آکھیا جو انہاں دی ہمیشہ کوشش رہی اَے جو صحافیاں نال رابطہ برقرار راہوے۔ وزیر اطلاعات صحافیاں دے مسئلیاں دے حل کیتے آپݨے عزم دا اعادہ کریندیں ہوئیں آکھیا جو صحافیاں دے روزگار دے تحفظ کوں پکا بݨایا ویسی۔ انہاں آکھیا جو صحافیاں کوں آپݨا حلقہ اَتے انہاں دا کسٹوڈین سمجھداں۔ انہاں پی آر اے دے کردار کوں ٻیا فعال بݨاوݨ اَتے ورکنگ ماحول بہتر بݨاوݨ کیتے مشوریاں تے عملدرآمد دی یقین دہانی کرائی اَے۔ وفاقی وزیر آکھیا جو جرنلسٹس پروٹیکشن کمیشن قائم تھی ڳئے جیڑھا جو خوش آئند اَے، کمیشن اچ سارے صحافتی تنظیماں دی نمائندگی موجود اے جئیں اچ نیشنل پریس کلب، پی آر اے، پی ایف یو جے، خیبر یونین آف جرنلسٹس سودھے پنجاب، سندھ اَتے بلوچستان دی نمائندگی وی شامل اَے۔ انہاں آکھیا جو کمیشن دا پہلا اجلاس تھی ڳئے اَتے ہݨ پی آر اے ورکنگ ماحول اَتے بئے مسئلیاں دے حوالے نال آپݨے مشورے ݙیوے جئیں دا خیرمقدم کریسوں۔