ودھدا درجہ حرارت اَتے گلیشیئرز تکھے پگھلݨ موسمیاتی تبدیلی دے براہ راست نتیجے ہِن، ڈاکٹر مصدق ملک

اسلام آباد۔ 5 دسمبر(اے پی پی) وفاقی وزیر موسمیاتی تبدیلی و ماحولیاتی ہم آہنگی ڈاکٹر مصدق ملک آکھیے جو ودھدا درجہ حرارت اَتے گلیشیئرز تکھے پگھلݨ کھنڈائی ونڄݨ آلی آلودگی اتےموسمیاتی تبدیلی دے براہ راست نتیجے ہِن۔ اے ڳالھ انہاں عالمی ادارہ تحفظِ قدرت (ڈبلیو ڈبلیو ایف) دے زیرِ اہتمام دریائے سندھ دی ڈولفن دے تحفظ دے 25 سال پُورے تھیوݨ دے موقع تے منعقدہ کانفرنس توں خطاب کریندے آکھی ۔ انہاں دریائے راوی دے پاݨی دے شدید آلودہ تھیوݨ تے تشویش دا اظہار کریندے آکھیا جو اے پاݨی ہݨ زراعت کیتے وی استعمال کرݨ دے قابل نی رہیا، اڄوکی چھل پاروں تھیوݨ آلا معاشی ضیان مجموعی قومی پیداوار (جی ڈی پی) دے 9.5 فیصد توں ودھ چُکیے، تاں جو ایں موسمیاتی آفتاں دی انسانی قیمت ایں توں ٻہوں زیادہ تکلیف ݙیوݨ آلی اے۔ انہاں ݙسایا جو گزریل چار وݙے سیلاباں دے دوران 4,700 توں ودھ بندے جاں بحق جݙاں جو 17,000 توں ودھ بندے معذور تھی چُکن۔ڈاکٹر مصدق ملک دریائے سندھ دی ڈولفن دے تحفظ کیتے ڈبلیو ڈبلیو ایف دیاں پراݨیاں خدمات دی تعریف کریندے وزارت دی بھرپور حمایت دا اعادہ کیتا۔ انہاں آکھیا جو حکومتِ پاکستان، ڈبلیو ڈبلیو ایف دے نال کھڑی اے اَتے حیاتیاتی تنوع دے تحفظ اَتے ماحولیاتی پائیداری کیتے نیڑے دا تعاون جاری رکھیا ویسی۔ انہاں ایں ڳالھ تے زور ݙتا جو دریائے سندھ دی ڈولفن دا تحفظ محض ہک ماحولیاتی ذمے واری کائنی بلکہ اے زندگی اَتے انسانیت دے تحفظ دا معاملہ اے۔