کراچی دے علاقے سولجر بازار وچ ترائے منزلہ رہائشی عمارت وچ سلنڈر دھماکے نال 16 بندے جاں بحق، کئی زخمی

کراچی۔ 19 فروری (اے پی پی) کراچی دے علاقے سولجر بازار وچ ترائے منزلہ رہائشی عمارت وچ سلنڈر دھماکے دے نتیجے وچ 16 بندے جاں بحق تھی ڳئن جݙاں جو 14 زخمی ہن۔ ریسکیو حکام موجب جاں بحق تھیوݨ آلیں اچ چار ٻال تے چھی تریمتاں شامل ہن۔ ریسکیو ذرائع موجب دھماکہ ٻدھ دی رات کوں عمارت دی پہلی منزل تے تھیا، جیندے پاروں عمارت دا ہک حصہ زمین بوس تھی ڳیا۔ ملبے تلے دٻیے لوکاں کوں کڈھݨ کیتے سارے دستیاب وسائل استعمال کیتے ویندے پئن تے امدادی کارروائیاں جاری ہن۔ ڈی آئی جی شرقی ڈاکٹر فرخ لنجار دے موجب ابتدائی اطلاعات توں پتہ لڳدے جو دھماکہ گیس لیکیج پاروں پیش آئے۔ انھاں دا آکھݨ ہئی جو ایں ڳالھ دا خدشہ اے جو ہک لاش ہݨ وی ملبے تلے دٻی ہوئی اے جݙاں جو ریسکیو آپریشن حالی جاری اے۔ ڈی آئی جی فرخ لنجار آکھیے جو دھماکے دی نوعیت دا حتمی فیصلہ کیمیائی معائنے دے بعد ہی کیتا ونڄ سڳسی تے واقعے دی مکمل تحقیقات کیتی ویسن۔ انھاں موجب متعلقہ محکمہ ایں ڳالھ دا جائزہ گھنسی جو عمارت قانونی ہئی یا غیر قانونی، تے ذمہ واراں دے خلاف قانون موجب کارروائی کیتی ویسی۔ ریسکیو ٹیماں سرچ آپریشن دے دوران کئی لوکاں کوں ملبے وچوں کڈھیا ۔ جاں بحق لوکاں وچ 10 سالہ نازیہ تے 60 سالہ محمد ریاض وی شامل ہن۔ حکام موجب 17 سالہ تے 19 سالہ چھوریں  دیاں لاشاں وی ملبے توں کڈھیاں ڳئن، جݙاں جو بعد وچ 18 سالہ خاتون دی لاش وی برآمد کر ڳھدی ڳئی اے۔