وفاقی وزیر داخلہ اسلام آباد اچ الیکٹرک بساں دے جدید ڈپو تے چارجنگ سینٹر دا افتتاح کر ݙتے، سروس کوں روات تئیں ودھاوݨ دا اعلان

اسلام آباد۔ 20 فروری (اے پی پی) وفاقی وزیر داخلہ محسن نقوی اسلام آباد بس سروس کوں روات تئیں ودھاوݨ دا اعلان کریندیں ہوئیں آکھیا جو انھاں بساں اچ سفر کرݨ آلے مسافراں دی تعداد سوا لکھ توں ودھا تے ݙھائی لکھ تک گھن ون٘ڄݨ دا وݙا ہدف رکھیا ڳئے۔ وفاقی دارالحکومت اچ ماحول دوست ٹرانسپورٹ کیتے وفاقی وزیر داخلہ الیکٹرک بساں دے جدید ڈپو تے چارجنگ سینٹر دا افتتاح کر ݙتے۔ ایں موقع تے انھاں خود الیکٹرک بس اچ سفر کر تے سہولتاں دا جائزہ وی گھدے۔ حکام بریفنگ ݙیندیں ہوئیں ݙسایا جو ڈپو اچ 64 چارجر لاوݨ دی گنجائش اے جیندے اچوں 50 لگ ڳئن۔ ہک چارجر صرف ݙو گھنٹیاں اچ ݙو بساں چارج کر سگدے۔ محسن نقوی آکھیا جو اسلام آباد دے 21 مختلف روٹس تے اے بساں چلدیاں پئن اتے پورے سسٹم کوں گوگل دے نال جوڑ ݙتا ڳئے تانجو مسافراں کوں سوکھ تھیوے۔ انھاں اے وی ݙسایا جو پنڈی تے اسلام آباد دے درمیان ریلوے سروس وی بحال کیتی ویندی پئی اے اتے پاکستان اچ الیکٹرک بساں بݨاوݨ دا کم شروع کیتا ویسی۔