وفاقی دارالحکومت دے رمضان بازاراں وچ چیزاں دے معیار تے قیمتاں تے کوئی سمجھوتہ نہ کیتا ویسی، ڈاکٹر طارق فضل چوہدری

اسلام آباد۔ 20 فروری (اے پی پی) وفاقی وزیر پارلیمانی امور ڈاکٹر طارق فضل چوہدری آکھیے جو وفاقی دارالحکومت اسلام آباد دے رمضان بازاراں وچ چیزاں دے معیار تے قیمتاں تے کوئی سمجھوتہ نہ کیتا ویسی، ملاوٹ تے ذخیرہ اندوزی کرݨ آلے ایں توں پرے رہن، نتاں انھاں کوں ایف آئی آر تے گرفتاری دا وی سامݨا کرݨا پئے سڳدے۔ ڈپٹی کمشنر تے اسسٹنٹ کمشنر اسلام آباد دے رلے جی سکس رمضان بازار دے دورے دے موقع تے میڈیا نال ڳالھ مہاڑ کریندے انھاں آکھیا اے جو رمضان المبارک دے مقدس مہینے وچ عوام کوں سستے دام کھاوݨ پیوݨ دیاں چیزاں ݙیوݨ انھاں بازاراں دے بݨاوݨ دا مقصد اے، اسلام آباد وچ ہݨ تئیں ست رمضان بازار لاتے ڳئن، ڈپٹی کمشنر تے اسسٹنٹ کمشنر سودھے سارے ضلعی انتظامیہ انھاں بازاراں دی مانیٹرنگ کریندی اے۔ انھاں آکھیا جو آبپارہ، پارک روڈ، بہارہ کہو، ترامڑی، جی ٹین سودھے ٻئے علاقیں وچ بازار لاتے ڳئن جِتھاں اٹا، کھنڈ، دالاں، گھیو، پھل تے سبزیاں دستیاب ہن۔ انھاں آکھیا جو اساݙا پہلا مقصد گھٹ قیمتاں وچ معیاری چیزاں ݙیوݨ اے، اساں سٹال ہولڈر توں کوئی کرایہ کائنی گھندے۔ انھاں آکھیا جو وزیراعظم انھاں بازاراں دی خود رپورٹ گھندن، اسلام آباد وچ ذخیرہ اندوزی کرݨ آلیں کوں مشورہ ݙینداں جو ایں توں بچن نتاں انھاں تے پرچہ وی تھی سڳدے تے انھاں دی گرفتاری وی تھی سڳدی اے۔