مادری زباناں انسان دی سُن٘ڄاݨ، وقار تے تہذیبی ورثے دی بنیاد ہن، انھاں دا تحفظ ساریاں دی سانجھی ذمہ واری اے، چیئرمین سینیٹ سید یوسف رضا گیلانی

اسلام آباد۔ 21 فروری (اے پی پی) چیئرمین سینیٹ سید یوسف رضا گیلانی آکھیا جو مادری زبان انسان دی سُن٘ڄاݨ، وقار تے تہذیبی ورثے دی بنیاد ہوندی اے، اے اساݙے رسم و رواج تے ثقافتی روایات دی آئینہ دار وی ہوندی اے۔ مادری زباناں دے عالمی ڈینہوار دے موقع تے آپݨے سنیھے اچ انھاں آکھیا جو مادری زبان ٻالاں دی شخصیت سازی اچ بنیادی کردار ادا کریندی اے۔ انھاں آکھیا جو پاکستان زباناں دا ہک خوبصورت گلدستہ اے جِتھاں پنجابی، سندھی، پشتو، بلوچی، سرائیکی، براہوی، ہندکو تے ٻیاں کئی زباناں ٻولی ویندن۔ اردو رابطے دی زبان اے لیکن ساری مادری زباناں برابر دے احترام دے لائق ہن۔ انھاں آکھیا جو انھاں زباناں دا تحفظ تے ترویج اساں ساریاں دی سانجھی ذمہ واری اے۔