دوحہ۔ 24 فروری (اے پی پی) وزیراعظم محمد شہباز شریف تے قطر دے وزیرِ مملکت برائے بیرونی تجارت ڈاکٹر احمد بن محمد السد پاکستان تے قطر وچال تجارت، سرمایہ کاری تے صنعتی تعاون کوں ٻیا ودھاوݨ دا عزم کریندیں ہوئیں ݙوہیں ملکاں دے متعلقہ حکام تے مشتمل ٹاسک فورس دا اجلاس سݙݨ تے اتفاق کیتے جیندے اچ پاکستان اچ قطری سرمایہ کاری کیتے ٹھوس تجاویز تے غور کیتا ویسی۔ منگل …
وزیراعظم محمد شہباز شریف تے قطر دے وزیرِ مملکت برائے بیرونی تجارت ڈاکٹر احمد بن محمد السد دا پاکستان تے قطر وچال تجارت، سرمایہ کاری تے صنعتی تعاون کوں ٻیا ودھاوݨ دا سانجھا عزم
دوحہ۔ 24 فروری (اے پی پی) وزیراعظم محمد شہباز شریف تے قطر دے وزیرِ مملکت برائے بیرونی تجارت ڈاکٹر احمد بن محمد السد پاکستان تے قطر وچال تجارت، سرمایہ کاری تے صنعتی تعاون کوں ٻیا ودھاوݨ دا عزم کریندیں ہوئیں ݙوہیں ملکاں دے متعلقہ حکام تے مشتمل ٹاسک فورس دا اجلاس سݙݨ تے اتفاق کیتے جیندے اچ پاکستان اچ قطری سرمایہ کاری کیتے ٹھوس تجاویز تے غور کیتا ویسی۔ منگل کوں وزیراعظم آفس دے میڈیا ونگ توں جاری بیان دے مطابق قطر دے وزیرِ مملکت برائے بیرونی تجارت ڈاکٹر احمد بن محمد السد وزیراعظم محمد شہباز شریف نال ملاقات کیتی ۔ ملاقات اچ نائب وزیراعظم تے وزیرِ خارجہ اسحاق ڈار، وفاقی وزیرِ اطلاعات تے نشریات عطاء اللہ تارڑ تے وزیراعظم دے معاون خصوصی طارق فاطمی وی موجود ہن ۔ ڈاکٹر احمد بن محمد السد پاکستان-قطر جوائنٹ بزنس ٹاسک فورس دے چیئرمین وی ہن۔ ملاقات دے دوران انھاں ݙوپاسہ تجارتی تے معاشی تعاون دا جائزہ گھدے اتے پاکستان قطر تعلقات اچ ودھدی ہوئی رفتار تے اطمینان دا اظہار کیتے ۔ وزیراعظم ݙوپاسہ تجارتی حجم کوں ودھاوݨ تے قطر کوں پاکستان دی برآمدات خاص طور تے زرعی مصنوعات، کھاوݨ پیوݨ دی چیزاں تے ویلیو ایڈڈ شئیں دی برآمدات کوں متنوع بݨاوݨ دی اہمیت تے زور ݙتے ۔ ݙوہیں پاسوں پاکستان-قطر مشترکہ وزارتی کمیشن دے چھینویں اجلاس دے فالو اپ تے ڳالھ کیتی اتے طے شدہ فیصلیاں تے عمل درآمد دے عزم دا اعادہ کیتے۔ وزیراعظم پاکستان دی سرمایہ کار دوست اصلاحات تے غیر ملکی سرمایہ کاری کوں سوکھا بݨاوݨ اچ خصوصی سرمایہ کاری سہولت کونسل دے کردار تے وی روشنی پاتی ۔ ڈاکٹر احمد بن محمد السد معاشی تعاون کوں ودھاوݨ تے ݙوہیں ملکاں دے درمیان نجی شعبے تے کاروباری رابطیاں کوں مضبوط بݨاوݨ اچ قطر دی دلچسپی دا اعادہ کیتے ۔ ݙوہیں پاسوں رمضان المبارک دے دوران ٹاسک فورس دا اجلاس سݙݨ تے وی اتفاق کیتے۔
