وزیراعظم فیول ریلیف سکیم کامیابی نال جاری اے، کہیں پرتشدد جتھے کوں اسلام آباد داخل نہ تھیوݨ ݙتا ویسے، عطاء اللہ تارڑ

اسلام آباد۔20 ستمبر (اے پی پی) وفاقی وزیرِ اطلاعات و نشریات عطاء اللہ تارڑ آکھیے جو وزیراعظم فیول ریلیف سکیم کامیابی نال جاری اے، ہݨ تئیں 22 لکھ لوک رجسٹرڈ جݙاں جو تقریباً 19 لکھ ٹوکن جاری تھی چکئن، غیر قانونی طور تے سڑکاں بند کرݨ تے شہریاں دی آونڄ اچ خلل پاوݨ دی اجازت نہ ݙتی ویسے، کہیں پرتشدد جتھے کوں اسلام آباد اچ داخل نہ تھیوݨ ݙتا ویسے، سڑکاں کھلی رکھیاں ویسن۔ اتوار کوں اتھاں وزیراعظم فیول ریلیف سکیم دے حوالے نال پریس کانفرنس نال خطاب کریندے وفاقی وزیرِ اطلاعات آکھیا جو وزیراعظم شہباز شریف دی طرفوں پورے پاکستان اچ خصوصی فیول ریلیف سکیم کامیابی نال جاری اے، خطے اچ کشیدگی دی وجہ نال پوری دنیا اچ تیل دیاں قیمتاں اچ ودھارا تھیندا پئے جیندے نال دنیا دیاں ساریاں معیشتاں کوں اپݨے گھیرے اچ گھن ڳھدے، جݙاں جو ایں دا دٻاؤ پاکستان تے وی آئے۔ انہاں آکھیا جو تیل دیاں قیمتاں اچ ودھارے دے بعد وزیراعظم شہباز شریف کافی عرصہ پہلے ایں سکیم دی منصوبہ بندی شروع کر ݙتی ہئی تے سارے متعلقہ محکمیں تے وزارتاں کوں بروقت ہدایات جاری کیتیاں جو ایجھی سکیم وضع کیتی ونڄے جئیں توں اشرافیہ، وݙیاں گاݙیاں دے مالکان تے ایلیٹ طبقہ نی بلکہ عام تے غریب آدمی فیدہ چا سڳے۔ وفاقی وزیر آکھیا جو ایں مقصد دے تحت خصوصی فیول ریلیف سکیم دا اجراء کیتا ڳیا۔ وزیراعظم ہر سطح تے ایں دی منصوبہ بندی دی خود نگرانی کیتی تے سکیم دے تحت آئی ٹی دا مکمل نظام وضع کروایا۔ وزارتِ آئی ٹی ایں مقصد کیتے باقاعدہ ڈیجیٹل ڈیش بورڈ وی تیار کیتا جݙاں جو رجسٹریشن دے نظام کیتے شارٹ کوڈ دے ذریعے ایس ایم ایس سروس شروع کیتی ڳئی۔ انہاں آکھیا جو ایں پورے نظام دے پچھوں ھک جامع آئی ٹی بیسڈ سسٹم موجود اے جیندے تحت رجسٹریشن کیتی ویندی اے تے اہل لوکاں کیتے ٹوکن جنریٹ کیتے ویندن۔ انہاں آکھیا جو ملک اچ سکیم دا کامیابی نال جاری رہݨ وزیراعظم شہباز شریف تے انہاں دی ٹیم دی نیک نیتی تے عوامی فلاح دے عزم دی عکاسی کریندے۔وفاقی وزیرِ اطلاعات آکھیا جو عوام تے میڈیا دی طرفوں ملݨ آلیاں تجویزاں تے وزیراعظم موٹر سائیکل، رکشہ تے چنگ چی کیتے اہلیت دی مدت 15 سال توں ودھا تے 20 سال کر ݙتی اے۔ انہاں آکھیا جو ہݨ یکم جنوری 2006ء یا ایں دے بعد رجسٹرڈ موٹر سائیکل، رکشہ تے چنگ چی ایں سکیم کیتے اہل ہوسن ۔ وفاقی وزیرِ اطلاعات آکھیا جو عوام دیاں تجویزاں تے وزیراعظم فیول ریلیف سکیم دے تحت ایس ایم ایس سروس مفت کر ݙتی اے جݙاں جو موٹر سائیکل، چنگ چی تے رکشہ کیتے پنج لیٹر فی ٹوکن دی شرط وی ختم کر ݙتی ڳئی اے۔ انہاں آکھیا جو ہݨ موٹر سائیکل، چنگ چی تے رکشہ صارفین کوں ہفتے اچ ھک واری 500 روپے دی فیول رعایت ملسی، ایویں او مہینہ چار واری ایں سہولت توں فیدہ چا سڳسن۔ اے سہولت پورے پاکستان، آزاد کشمیر تے گلگت بلتستان اچ دستیاب اے۔ وفاقی وزیر آکھیا جو 800 سی سی گاݙیاں کوں ہر ݙاہ ڈینھ بعد 10 لیٹر پٹرول تے 100 روپے فی لیٹر رعایت ݙتی ویندی پئی اے، جیندے تحت ماہانہ 30 لیٹر پٹرول رعایتی نرخ تے حاصل کیتا ونڄ سڳدے۔ انہاں آکھیا جو سکیم دے تحت سارے پیٹرول پمپس رجسٹرڈ ہن جݙاں جو وزارتِ آئی ٹی مانیٹرنگ کیتے کنٹرول روم تے ریئل ٹائم میپنگ دا نظام قائم کیتے۔ سکیم دی نگرانی 24 گھنٹے جاری اے تے کہیں وی مسئلے دا وقتی ازالہ کیتا ویندا پئے۔وفاقی وزیر آکھیا جو ہݨ تئیں 22 لکھ لوک سکیم اچ رجسٹر تھی چکئن جنہاں اچ 92 فیصد موٹر سائیکل، چنگ چی تے رکشہ استعمال کرݨ آلے ہن۔ انہاں آکھیا جو سمارٹ فون نہ رکھݨ آلے لوک وی شارٹ کوڈ تے ایس ایم ایس دے ذریعے رجسٹریشن کرا سڳدن۔ سکیم توں استفادہ کرݨ کیتے متعلقہ گاݙی دا مالک ہووݨ وی ضروری کائنی، صرف گاݙی دی رجسٹریشن دی تفصیلات تے شناختی کارڈ نمبر درکار اے۔ انہاں آکھیا جو صرف گزریل ݙینھ تقریباً 5 لکھ 57 ہزار رجسٹریشنز تھئن جݙاں جو ہݨ تئیں تقریباً 19 لکھ ٹوکن جاری کیتے ونڄ چکئن جنہاں اچ تقریباً 18 لکھ موٹر سائیکل، چنگ چی تے رکشہ کیتے جݙاں جو ھک لکھ 800 سی سی تئیں گاݙیاں کیتے ہن۔ وفاقی وزیر آکھیا جو وزیراعظم شہباز شریف سکیم دی لمحہ بہ لمحہ نگرانی کریندے پئن تے متعلقہ وزارتاں، اوگرا تے ٻئے اداریں کوں ایں حوالے نال مکمل طور تے متحرک کیتا ڳئے۔ وفاقی وزیرِ اطلاعات آکھیا جو مجموعی سبسڈی ݙیوݨ دے بجائے مستحق لوکاں کوں ہدف بݨا تے ریلیف ݙیوݨ زیادہ اوکھا کم ہئی کیوں جو عمومی سبسڈی دی صورت اچ وݙیاں گاݙیاں دے مالکان وی ایں توں فیدہ چیندے جݙاں جو موجودہ سکیم دے ذریعے صرف مستحق لوکاں کوں ریلیف پڄایا ویندا پئے۔ انہاں آکھیا جو سکیم کوں ڈیزائن کرݨ تے ایں تے موثر انداز اچ عملدرآمد یقینی بݨاوݨ سوکھا کم نہ ہئی ۔ انہاں سارے میڈیا ہاؤسز، پاکستان براڈ کاسٹرز ایسوسی ایشن، پرنٹ، الیکٹرانک تے سوشل میڈیا دا شکریہ ادا کریندے آکھیا جو عوامی صلاح دی روشنی اچ سکیم کوں مزید بہتر بݨایا ویندا رہسی۔ ھک سوال دے جواب اچ وفاقی وزیرِ اطلاعات آکھیا جو غیر قانونی طور تے سڑکاں بند کرݨ تے شہریاں دی آونڄ اچ خلل پاوݨ دے حوالے نال اسلام آباد ہائی کورٹ دے واضح احکامات موجود ہن، حکومت تے انتظامیہ دی ذمہ واری اے جو سڑکاں تے کہیں قسم دا خلل نہ آوݨ ݙتا ونڄے۔ انہاں آکھیا جو انتظامیہ، پولیس، وزارتِ داخلہ سودھے پوری حکومت ایں معاملے تے واضح اے، کہیں پرتشدد جتھے کوں اسلام آباد اچ داخل نہ تھیوݨ ݙتا ویسے تے رستے کھلے رکھیے ویسن۔ ھک ٻئے سوال دے جواب اچ وفاقی وزیرِ اطلاعات آکھیا جو فیول ریلیف سکیم دی رجسٹریشن اچ ساریں توں ودھ شکایات “مس میچ” نال متعلق ملئن۔ کجھ لوک رہائش دے شہر دے مطابق اندراج کیتا جݙاں جو گاݙی یا موٹر سائیکل کہیں ݙوجھے صوبے اچ رجسٹرڈ ہئی جیں پاروں مسئلے سامݨے آئے ۔ انہاں آکھیا جو رجسٹریشن دے طریقہ کار متعلق گزریل 8 توں 10 ݙینھ توں ٹی وی تے مسلسل آگاہی مہم چلائی ویندی پئی اے۔وفاقی وزیر آکھیا جو سکیم دے تحت پیٹرول پمپس دی میپنگ مکمل کر ڳھدی ڳئی اے، جیندے ذریعے ٹوکن دے استعمال تے رعایتی فیول دے اجراء دی تفصیلات ݙٹھیاں ونڄ سڳدن۔ ھک سوال دے جواب اچ انہاں آکھیا جو جماعتِ اسلامی نال ہر سطح تے رابطہ رہندے، تاں جو قانون ساریں کیتے ھک ہے تے سڑکاں بند کرݨ دی اجازت کہیں کوں نی ݙتی ونڄ سڳدی۔ وفاقی وزیر آکھیا جو وزیراعظم شہباز شریف کفایت شعاری اقدامات تے عملدرآمد یقینی بݨائے جنہاں اچ غیر ضروری سفر، اخراجات تے تقریبات اچ کمی تے ویڈیو کانفرنس کوں ترجیح ݙیوݨ شامل اے۔ انہاں آکھیا جو وزیراعظم دے اقوامِ متحدہ جنرل اسمبلی اجلاس دے دورے دے موقع تے وفد اچ وزیرِ خارجہ تے طارق فاطمی شامل ہن جݙاں جو وزیرِ منصوبہ بندی، وزیرِ موسمیاتی تبدیلی تے وزیرِ اطلاعات وفد دا حصہ کائنی۔ انہاں آکھیا جو وزیراعظم دا اے وفد ٻہوں مختصر اے۔