دوحہ۔ 24 فروری (اے پی پی) پاکستان تے قطر بزنس ٹو بزنس تعلقات دے ودھارے کیتے کاروباری اداریں تے کاروباری لوکاں وچال رابطے سوکھے بݨاوݨ کیتے خصوصی کوششاں تے اتفاق کیتے جݙاں جووزیراعظم محمد شہباز شریف پاکستان تے قطر دے درمیان اقتصادی تے تجارتی رابطے کوں مضبوط بݨاوݨ وچ قطر بزنس مین ایسوسی ایشن دے تعمیری کردار دی تعریف کیتی اے۔ وزیراعظم دفتر دے میڈیا ونگ توں جاری بیان موجب …
وزیراعظم شہباز شریف نال قطر بزنس مین ایسوسی ایشن دے وفد دی ملاقات
دوحہ۔ 24 فروری (اے پی پی) پاکستان تے قطر بزنس ٹو بزنس تعلقات دے ودھارے کیتے کاروباری اداریں تے کاروباری لوکاں وچال رابطے سوکھے بݨاوݨ کیتے خصوصی کوششاں تے اتفاق کیتے جݙاں جووزیراعظم محمد شہباز شریف پاکستان تے قطر دے درمیان اقتصادی تے تجارتی رابطے کوں مضبوط بݨاوݨ وچ قطر بزنس مین ایسوسی ایشن دے تعمیری کردار دی تعریف کیتی اے۔ وزیراعظم دفتر دے میڈیا ونگ توں جاری بیان موجب وزیراعظم نال قطر بزنس مین ایسوسی ایشن دے وفد شیخ فیصل بن قاسم الثانی، چیئرمین کیو بی اے دی سربراہی وچ ملاقات کیتی اے۔ وفد دا خیرمقدم کریندے وزیراعظم پاکستان تے قطر وچال اقتصادی تے تجارتی رابطے کوں مضبوط بݨاوݨ وچ قطر بزنس مین ایسوسی ایشن دے تعمیری کردار دی تعریف کیتی ۔انھاں ایں ڳالھ تے زور ݙتے جو پاکستان ݙوطرفہ شراکت داری دے ہک اہم ستون دے طور تے نجی شعبے دی قیادت وچ مصروفیات کوں اہمیت ݙیندے ۔ پاکستان دے بہتر تھیندے معاشی اشاریں تے غیر ملکی سرمایہ کاری دی سہولت کیتے متعارف کرائے ڳئے اصلاحاتی اقدامات تے روشنی پاتی، وزیراعظم کیو بی اے دے اراکین کوں انفراسٹرکچر، لاجسٹکس، توانائی، زراعت، ٹیکنالوجی تے برآمدات تے مبنی مینوفیکچرنگ وچ موقع تلاش کرݨ دی دعوت ݙتی ۔ انھاں سرمایہ کاراں کیتے شفافیت، کارکردگی تے وقتی فیصلہ سازی کوں یقینی بݨاوݨ کیتے ون ونڈو پلیٹ فارم دے طور تے خصوصی سرمایہ کاری سہولت کونسل (ایس آئی ایف سی) دے کردار تے زور ݙتا۔ شیخ فیصل بن قاسم الثانی بزنس ٹو بزنس تعاون ودھاوݨ تے پاکستان وچ سرمایہ کاری دے موقع تلاش کرݨ وچ دلچسپی دا اظہار کیتا ۔ فریقین نیڑے رابطے برقرار رکھݨ تے اتفاق کیتا جیندے وچ اڄوکے مہینے دے اخیر وچ پاک-قطر سرمایہ کاری متعلق ٹاسک فورس دے دوحہ دے اڳلے دورے دے نال نال تجارتی فورمز دی میزبانی وی شامل اے تاں جو ڳالھ مہاڑ کوں ٹھوس اقتصادی شراکت داری وچ تبدیل کیتا ونڄ سڳے۔ فریقین ݙوہیں ملکاں دے کاروباری اداریں تے کاروباری لوکاں وچال رابطے سوکھے بݨاوݨ کیتے خصوصی کوششاں کرݨ تے اتفاق کیتے تاں جو ݙوہیں ملکاں وچال بزنس ٹو بزنس تعلقات کوں ودھایا ونڄ سڳے ۔ ملاقات وچ پاکستان تے قطر دے اپݨے اپݨے نجی شعبیں وچال مضبوط تعاون دے ذریعے تجارتی تے سرمایہ کاری دے تعلقات کوں مزید وسعت ڈیوݨ دے سانجھے عزم دا اعادہ کیتا ڳئے۔ ملاقات وچ نائب وزیراعظم تے وزیر خارجہ اسحاق ڈار، وفاقی وزیر اطلاعات و نشریات عطاء اللہ تارڑ تے وزیراعظم دے معاون خصوصی طارق فاطمی وی موجود ہن۔
