وزیراعظم محمد شہباز شریف دا عالمی منڈی اچ تیل دی قیمتاں ودھݨ دے باوجود عوام نال کیتے ڳئے وعدے دے مطابق پٹرولیم مصنوعات دی قیمتاں نہ ودھاوݨ دا فیصلہ

لاہور۔ 13 مارچ (اے پی پی ( وزیراعظم محمد شہباز شریف عالمی منڈی اچ تیل دی ٻئی قیمتاں ودھݨ دے باوجود عوام نال کیتے ڳئے وعدے دے مطابق ایں واری پٹرولیم مصنوعات دی قیمتاں نہ ودھاوݨ دا فیصلہ کیتے۔ وزیراعظم آفس دے میڈیا ونگ توں جمعہ کوں جاری بیان دے مطابق وزیراعظم آکھیا جو عام آدمی تے ٻوجھ ڳھٹ کرݨ کیتے، قیمتاں اچ اضافہ کائنی کیتا ویندا پیا۔ وزیراعظم آکھیا جو وعدے دے مطابق جتنا تھی سڳیا، انھاں اوکھے حالات اچ عوام کوں ریلیف ݙیسوں۔ انھاں آکھیا جو خطے اچ کشیدگی پاروں عالمی معیشت ایں ویلے دباؤ اچ اے جیندے پاکستان دی معیشت تے گہرے اثرات پووݨ دا خدشہ اے، تاہم بروقت پالیسی سازی، حکومت ولوں بچت دے اقدامات تے مالی نظم و ضبط پاروں ایں صورتحال نال احسن طریقے نال انسانی حد تئیں نبڑݨ دی کوشش کیتی ویندی پئی اے۔ وزیراعظم آکھیا جو بطور خادمِ پاکستان انھاں اوکھے حالات اچ غریب آدمی تے ٻوجھ گھٹ کرݨ کیتے ایں ملک دی اشرافیہ تے حکومت توں شروعات کرݨ دا عزم کیتے۔ وفاقی حکومت اچ بچت اقدامات دے نال نال صوبائی حکومتاں وی انھاں اقدامات اچ وفاقی حکومت دا بھرپور ساتھ ݙیندی پئن جیہڑی جو خوش آئند ڳالھ اے۔ وزیراعظم آکھیا جو اللہ دے فضل و کرم نال سفارتی تے معاشی ٹیم دی کوششاں پاروں خام تیل دی ملکی ضرورتاں کیتے مناسب مقدار میسر اے۔ وفاقی تے صوبائی حکومتاں رل تے کہیں کوں وی حکومت ولوں مقرر کیتی ڳئی قیمت توں ودھ قیمت وصول کرݨ توں روکݨ کوں یقینی بݨیندیاں پئن۔ انھاں دعا کیتی جو عالمی سطح تے حالات بہتر تھوݨ تے عالمی منڈی اچ پٹرولیم مصنوعات دی قیمتاں اچ استحکام آوے، جیندے نال سب دا بھلا تھیسی۔