آپریشن غضب للحق دے دوران فتنہ الخوارج دے 684 دہشت گرد ہلاک، وفاقی وزیر اطلاعات عطا اللہ تارڑ

اسلام آباد۔15مارچ (اے پی پی) آپریشن غضب للحق دے دوران 15 مارچ 2026ء تریجھے پہر 4 وڄے تئیں فتنہ الخوارج / افغان طالبان دے 684 دہشت گرد ہلاک تے 912 توں ودھ زخمی تھی ڳئے۔ وفاقی وزیر اطلاعات و نشریات عطا اللہ تارڑ اتوار کوں سماجی رابطے دے پلیٹ فارم “ایکس” تے اپݨی ہک پوسٹ وچ ݙسایا جو آپریشن غضب للحق دے دوران افغان طالبان دیاں 252 پوسٹاں تباہ تھیاں جݙاں جو 44 پوسٹاں کوں قبضے وچ گھن تے تباہ کیتا ڳیا۔ ایں طرح 229 ٹینک، بکتر بند گاݙیاں تے توپاں تباہ کیتیاں ڳیاں۔ افغانستان وچ دہشت گرداں تے انھاں دے معاون انفراسٹرکچر دے 73 جہیں کوں فضائی کارروائی وچ موثر طریقے نال نشانہ بݨایا ڳیا۔ 14 تے 15 مارچ دی وچلی رات پاکستان دیاں مسلح افواج افغان طالبان تے فتنہ الخوارج دے دہشت گرداں دے ٹھکاݨیں سودھے فوجی تنصیبات کوں نشانہ بݨایا۔ انھاں کارروائیاں دے دوران قندھار وچ ہک تکنیکی معاونت دا مرکز تے اسلحہ و سازوسامان دے ذخیرے دی تنصیب وی تباہ کر ݙتی ڳئی جینکوں افغان طالبان تے دہشت گرد پاکستان دے نشوم شہریاں دے خلاف استعمال کریندے پئے ہن۔ قندھار وچ ہک سرنگ وی تباہ کر ݙتی ڳئی جیندے وچ افغان طالبان تے فتنہ الخوارج دے تکنیکی آلات تے سامان رکھا ڳیا ہئی۔ ایویں چترال سیکٹر وچ زمینی افواج افغانستان دی بدینی پوسٹ تے قائم دہشت گرداں دے لانچ پوائنٹ کوں وی تباہ کر ݙتا۔ جاری کیتی ڳئی ویڈیو وچ واضح طور تے ݙکھایا ڳئے جو پاکستان انتہائی درستگی دے نال صرف انھاں تنصیبات تے دہشت گرد کیمپاں کوں نشانہ بݨائے جیڑھے افغانستان دی سرزمین توں دہشت گردی دی براہِ راست یا بالواسطہ حمایت کریندے پئن۔ کہیں شہری آبادی یا سول انفراسٹرکچر کوں نشانہ کائنی بݨایا ڳیا جیویں جو افغان عبوری حکومت دے کجھ عہدیداراں تے میڈیا ولوں غلط پروپیگنڈا کیتا ویندا پئے۔