احتجاج، دھرنے تے ہڑتالاں مسئلیں دا حل کائنی، ڈائیلاگ دا رستہ ہی ساریں توں بہتر تے مناسب اے، وفاقی وزیرِ خزانہ محمد اورنگزیب

اسلام آباد۔20 ستمبر(اے پی پی) وفاقی وزیرخزانہ سینیٹر محمد اورنگزیب آکھیے جو مارچ، دھرنیں تے ہڑتالاں نال معاشی سرگرمیاں معطل تھی سڳدن جیندے نال قومی معیشت کوں یومیہ تقریباً 120 ارب روپے دے ضیان دا ݙر ہے۔ انہاں ݙسایا جو ایں توں سروسز سیکٹر کوں 86 ارب، صنعتی شعبے کوں 25 ارب، جݙاں جو کنسٹرکشن تے سپلائی چین کوں 9 ارب روپے روزانہ دا ضیان تھیسی، جݙاں جو ایف بی آر دے ٹیکس محصولات اچ وی 18 ارب روپے دا گھاٹا تھی سڳدے۔ وزیرِ خزانہ واضح کیتا جو آئی ٹی دیاں برآمدات 80 فیصد تئیں متاثر تھی سڳدن تے گزریل ہڑتالاں دی معاشی ریکوری اچ ملک کوں ھک توں ݙڈھ مہینے دا عرصہ لڳیا ہئی۔ انہاں معاشی حقائق پیش کریندے ݙسایا جو ملک دے زرمبادلہ دے ذخیرے 21.4 ارب ڈالر تئیں پڄ چکن، مالیاتی خسارہ گھٹ تھی تے 2.6 فیصد تے آڳئے، تے 14 سال بعد کرنٹ اکاؤنٹ سرپلس تھئے۔ جاری مالی سال اچ آئی ٹی برآمدات 5.5 ارب ڈالر تے مجموعی برآمدات 32.9 ارب ڈالر تئیں پڄݨ دی امید اے، جݙاں جو جی ڈی پی گروتھ 4 فیصد توں اتے رہݨ دی توقع اے۔ انہاں آکھیا جو مشرقِ وسطیٰ دے جھیڑے نال تجارتی لاڳت تے انشورنس اچ ودھارا تھئے ، لیکن ملک درست سمت اچ گامزن اے۔ سینیٹر محمد اورنگزیب سارے فریقاں تے زور ݙتا جو احتجاج تے ہڑتالاں مسئلیں دا حل کائنی، تے مسئلے دے خاتمے کیتے ڈائیلاگ دا رستہ ہی ساریں توں بہتر تے مناسب اے۔ وزیرِ خزانہ مزید آکھیا جو ملک اچ مقامی تے غیر ملکی سرمایہ کاری کوں ودھارا ݙیوݨ کیتے معاشی تے سیاسی استحکام ٻہوں ضروری اے، تے پی آئی اے دی نجکاری جیھے اقدامات نال عالمی سرمایہ کاراں دے اعتماد اچ ودھارا تھئے۔ انہاں چتاوݨی ݙتی جے احتجاجی سیاست دی وجہ توں انٹرنیٹ یا کنیکٹیوٹی ڈسٹرب تھیندی اے تاں ایں نال ملک کوں وݙا معاشی سیٹ بیک پڄسی۔ سینیٹر محمد اورنگزیب سارے متعلقہ فریقاں تے زور ݙتا جو او ملکی مفاد دی خاطر احتجاج دا رستہ چھوڑ تے میز تے ٻہن تے سارے پیش آندے مسئلیں کوں سانجھی مشاورت نال مُکاون۔