وفاقی وزیرِ داخلہ محسن نقوی دی شہید کیپٹن حمزہ اکرم دے گھر ونڄ تے فاتحہ خوانی

اسلام آباد۔20 ستمبر (اے پی پی) وفاقی وزیرِ داخلہ محسن نقوی وطنِ عزیز دے بہادر سپوت شہید کیپٹن حمزہ اکرم دی رہائش تے ڳئن۔ وزارتِ داخلہ توں جاری بیان موجب وفاقی وزیرِ داخلہ شہید کیپٹن حمزہ اکرم دے والد تے بھرا نال ملاقات کیتی، دلی ہمدردی تے تعزیت دا اظہار کیتا۔ وفاقی وزیرِ داخلہ شہید کیپٹن حمزہ اکرم دے درجات دی بلندی کیتے فاتحہ خوانی کیتی۔ انہاں شہید کیپٹن حمزہ اکرم دے والد دے بلند حوصلے و جذبے دی تعریف کیتی ۔ ایں موقع تے شہید کیپٹن حمزہ اکرم دے والد آکھیا جو میݙا پتر حمزہ پاکستان تے قربان تھیا، ݙوجھا پتر وی پاکستان کیتے حاضر اے، شہید حمزہ اساݙا سر فخر نال اُچا کرݙتے۔ انہاں آکھیا جو پاکستان ہے تاں اساں ہیسے، پاکستان کائنی تاں کجھ کائنی۔ وفاقی وزیرِ داخلہ آکھیا جو تساں جیھے عظیم والد دے حوصلے تے پوری قوم کوں ماݨ اے۔ شہید کیپٹن حمزہ اکرم دا غیر معمولی جرات تے بلند جذبہ ہی قوم دی اصل طاقت اے۔ محسن نقوی مزید آکھیا جو کیپٹن حمزہ اکرم 7 خوارجیاں کوں جہنم واصل کر تے بہادری دی اعلیٰ مثال قائم کیتی۔ انہاں آکھیا جو شہید کیپٹن حمزہ اکرم سودھے ہر شہید دے خون دا ھک ھک قطرہ وطن دے تحفظ دی ضمانت اے۔ قوم شہید کیپٹن حمزہ اکرم تے انہاں دے خاندان دیاں قربانیاں دا قرض ادا نی کرسڳدی۔ انہاں آکھیا جو شہید کیپٹن حمزہ اساݙے دلاں اچ زندہ ہن تے ہمیشہ زندہ رہسن۔ واضح رہے جو کیپٹن حمزہ اکرم ہنگو اچ خوارجیاں دا بہادری نال مقابلہ کریندے شہید تھئے ہن۔