امریکی صدر دے جنگ بندی اعلان دے بعد عالمی مارکیٹ اچ تیل دی قیمتاں اچ 15 فیصد ڳھٹکی، سٹاک مارکیٹس اچ بہتری

لندن۔ 8 اپریل (اے پی پی) امریکی صدر ڈونلڈ ٹرمپ دے جنگ بندی اعلان دے بعد عالمی مارکیٹ اچ تیل دی قیمتاں اچ تقریباً 15 فیصد ڳھٹکی اتے سٹاک مارکیٹس اچ بہتری ݙٹھی ڳئی اے۔ برطانوی اخبار ’گارڈین‘ دی رپورٹ دے مطابق برینٹ دی قیمت 14.4 فیصد ڳھٹکی دے نال 93.48 ڈالر تے آ ڳئی جݙاں جو امریکی خام تیل دی قیمت 14.7 فیصد ڳھٹکی دے نال 96.27 ڈالر فی بیرل تھی ڳئی اے۔ جنگ بندی اعلان دے بعد ایشیا اچ تجارت دے آغاز تے ای آسٹریلیا، جاپان تے جنوبی کوریا دے انڈیکس اچ واضح اضافہ تھیے۔ منگل دی رات امریکی صدر ڈونلڈ ٹرمپ ولوں ٹروتھ سوشل تے پوسٹ اچ آکھیا ڳیا ہئی جو انھاں دی ڈیڈ لائن گزرݨ اچ صرف ہک گھنٹہ باقی  اے۔ لیکن او ایران دے پُلاں، پاور پلانٹس تے ٻئے شہری اہداف تے حملیاں کوں روکیندے پئن، جݙاں جو تہران ݙو ہفتے دی جنگ بندی تے آبنائے ہرمز کوں ولا کھولݨ تے راضی  اے۔ ایندے فوراً بعد، ایران دی قومی سلامتی کونسل تصدیق کیتی جو اگر ایران دے خلاف حملیاں کوں روک ݙتا ونڃے تاں انھاں ݙو ہفتے دی جنگ بندی کوں قبول کر گھدے۔ ایران آکھیا جو امریکہ دے نال امن مذاکرات جمعہ کوں اسلام آباد اچ شروع تھیسن ۔ این توں پہلے پاکستان ولوں فریقین توں ݙو ہفتیاں کیتے جنگ بندی دی درخواست کیتی ڳئی ہئی۔