آبادی اچ تکھے اضافے نال سب توں وݙا چیلنج بݨ ڳئے، وفاقی وزیر برائے قومی صحت دا قومی پروگرام برائے استحکامِ آبادی دے حوالے نال تھیوݨ آلی تقریب توں خطاب

اسلام آباد۔ 9 جون (اے پی پی) وفاقی وزیر برائے قومی صحت سید مصطفیٰ کمال آکھیے جو پاکستان اچ ہر سال تقریباً 56 لکھ توں ودھ ٻال پیدا تھیندن اتے آبادی اچ تکھا اضافہ سب توں وݙا چیلنج بݨ ڳئے۔ قومی پروگرام برائے استحکامِ آبادی (35-2026) دے حوالے نال تھیوݨ آلی تقریب توں خطاب کریندیں ہوئیں وفاقی وزیر آکھیے جو ودھدی ہوئی آبادی ملکی وسائل، روزگار، تعلیم، صحت تے ٻیاں بنیادی سہولتاں تے شدید دباؤ پیندی پئی اے۔ انھاں آکھیے جو حکومت آبادی اچ اضافے دے مسئلے نال نبڑݨ کیتے عملی اقدامات کریندی پئی اے اتے ایں سلسلے اچ قومی سطح تے مربوط حکمتِ عملی اختیار کیتی ویندی پئی اے۔ انھاں آکھیے جو آبادی اچ اضافے دے باعث نوجواناں کوں سرکاری ملازمتاں سمیت مختلف شعبیاں اچ مشکلات دا سامݨا اے۔ انھاں آکھیے جو خاندانی منصوبہ بندی یونیورسل ہیلتھ کوریج دی بنیاد اے تے صحت مند معاشرے دی تشکیل کیتے آبادی اچ توازن ضروری اے۔ اجلاس دے دوران حکام بریفنگ ݙیندیں ہوئیں ݙسائے جو آبادی اچ موجودہ رفتار نال اضافہ جاری رہیا تاں پاکستان دی آبادی 2050 تئیں 39 کروڑ تئیں پڄ سڳدی اے جئیں نال ملکی وسائل تے شدید دباؤ دا خطرہ اے۔ ایں موقع تے وفاقی وزیرِ صحت زور ݙتے جو آبادی دے استحکام دے قومی ہدف دے حصول کیتے سیاسی عزم، بین الصوبائی ہم آہنگی، مؤثر پالیسی سازی تے مطلوبہ وسائل دی فراہمی ضروری اے۔ تقریب اچ شریک ترقیاتی شراکت داراں پاکستان دے آبادی استحکام ایجنڈے دی حمایت جاری رکھݨ دے عزم دا اظہار کیتا اتے قومی پروگرام برائے استحکامِ آبادی 35-2026 دے اہداف دے حصول اچ تعاون دی یقین دہانی کرائی۔