فیلڈ مارشل عاصم منیر نال کمانڈر بحرین نیشنل گارڈ شیخ محمد بن عیسیٰ دی ملاقات، آپسی دلچسپی دے معاملیاں سودھے دفاعی تے سکیورٹی تعاون کوں ٻیا فروغ ݙیوݨ دے امکانات تے ڳالھ مہاڑ

راولپنڈی۔ 9 جون (اے پی پی) آرمی چیف تے چیف آف ڈیفنس فورسز فیلڈ مارشل سید عاصم منیر، پاک بحریہ دے سربراہ ایڈمرل نوید اشرف تے پاک فضائیہ دے سربراہ ایئر چیف مارشل ظہیر احمد بابر سدھو نال بحرین نیشنل گارڈ دے کمانڈر شیخ محمد بن عیسیٰ بن سلمان آل خلیفہ انڄ انڄ ملاقاتاں کیتیاں، آپسی دلچسپی دے امور، خطے دی سکیورٹی صورتحال تے دفاعی تے سکیورٹی تعاون کوں ٻیا فروغ ݙیوݨ دے امکانات تے ڳالھ کیتی۔ منگل کوں آئی ایس پی آر توں جاری تھیوݨ آلے بیان دے مطابق آرمی چیف تے چیف آف ڈیفنس فورسز فیلڈ مارشل سید عاصم منیر نال بحرین نیشنل گارڈ دے کمانڈر شیخ محمد بن عیسیٰ بن سلمان آل خلیفہ جنرل ہیڈ کوارٹرز (جی ایچ کیو) راولپنڈی اچ ملاقات کیتی۔ ملاقات دے دوران آپسی دلچسپی دے امور، خطے دی سکیورٹی صورتحال تے دفاعی تے سکیورٹی تعاون کوں مزید فروغ ݙیوݨ دے امکانات تے ڳالھ کیتی ڳئی۔ ݙونھیں معزز شخصیتاں پاکستان تے بحرین دے درمیان دیرینہ برادرانہ تعلقات تے اطمینان دا اظہار کریندیں ہوئیں عسکری سطح تے تعاون کوں ٻیا مضبوط بݨاوݨ دی اہمیت تے زور ݙتا۔ ایں توں پہلے بحرین نیشنل گارڈ دے کمانڈر پاک بحریہ دے سربراہ ایڈمرل نوید اشرف تے پاک فضائیہ دے سربراہ ایئر چیف مارشل ظہیر احمد بابر سدھو نال وی انڄ انڄ ملاقات کیتی۔ بحرین نیشنل گارڈ دے کمانڈر تے پاک بحریہ دے سربراہ ایڈمرل نوید اشرف دے درمیان نیول ہیڈ کوارٹرز اچ تھیوݨ آلی ملاقات اچ ݙو پاسے دفاعی تعاون تے علاقائی سکیورٹی دی صورتحال تے ڳالھ تھئی۔ بحرینی کمانڈر خطے اچ مشترکہ بحری سلامتی دے فروغ اچ پاک بحریہ دے تعمیری کردار کوں سراہیندیں ہوئیں ایں کوں علاقائی بحری سلامتی دے استحکام اچ اہم کردار ادا کرݨ آلا ادارہ قرار ݙتا۔ بحرین نیشنل گارڈ دے کمانڈر تے پاک فضائیہ دے سربراہ ایئر چیف مارشل ظہیر احمد بابر سدھو دے درمیان ایئر ہیڈ کوارٹرز اچ ملاقات دے دوران چیف آف ایئر سٹاف نے پاک فضائیہ دی جدید کاری دیاں کوششاں تے روشنی پاتی جنھاں اچ صلاحیتاں اچ اضافہ، بنیادی ڈھانچے دی ترقی، مقامی سطح تے تیاری (انڈیجینائزیشن) تے جدید تربیتی اصلاحات شامل ہن۔ ملاقات اچ ابھردی ہوئی دفاعی ٹیکنالوجیز جیویں جو ڈرونز، مصنوعی ذہانت (اے آئی)، خودکار نظام، جدید سینسرز تے ڈیجیٹل جدت دے علاوہ فضائی دفاع کوں درپیش نویں چیلنجز تے مربوط دفاعی نظاماں تے وی ڳالھ کیتی ڳئی۔بحرینی کمانڈر پاکستان دی مسلح افواج دی پیشہ ورانہ مہارت، آپریشنل تیاری تے خطے اچ امن تے استحکام کیتے انھاں دیاں خدمات کوں سراہیا۔ انھاں پاکستان دی مسلح افواج دی جدید کاری تے مقامی دفاعی صلاحیتاں دی وی تعریف کیتی تے تربیت، جدید ٹیکنالوجیز تے استعداد کار ودھاوݨ دے شعبیاں اچ ٻئے تعاون اچ دلچسپی دا اظہار کیتا۔ اے دورہ پاکستان تے بحرین دے درمیان مضبوط تے دیرپا دفاعی شراکت داری دی عکاسی کریندے تے توقع اے جو ایں نال ݙوٹھیں برادر ملکاں دے باہمی مفاد اچ دفاعی تعاون کوں ٻیا فروغ ملسی۔