فلپائن اچ 7.8 شدت دے زلزلے نال 45 بندے ہلاک، 17 لاپتہ

منیلا۔ 10 جون (اے پی پی) فلپائن دے جنوبی جزیرے منڈاناؤ دے ساحل دے نیڑے آوݨ آلے 7.8 شدت دے طاقتور زلزلے دے نتیجے اچ کم از کم 45 افراد ہلاک، 17 لاپتہ تے 487 زخمی تھی ڳئن۔ شنہوا دے مطابق فلپائن دی قومی ڈیزاسٹر رسک ریڈکشن اینڈ مینجمنٹ کونسل ݙسائے جو زلزلہ پیر دے ݙینھ منڈاناؤ دے جنوبی ساحلی علاقے دے نیڑے آیا جئیں دے بعد متعدد علاقیاں اچ وݙے پیمانے تے تباہی ݙٹھی ڳئی۔ حکام دا آکھݨ اے جو امدادی ٹیماں متاثرہ علاقیاں اچ سرچ اینڈ ریسکیو کارروائیاں جاری رکھے ہوئن جڈانجو لاپتہ افراد دی بھال (تلاش) کیتے کوششاں تکھی کر ݙتیاں ڳئن۔ زلزلے دے باعث کئی عمارتاں، سڑکاں تے بنیادی ڈھانچے کوں نقصان تھیا جڈانجو متعدد خاندان بے گھر تھی ڳئن۔ زخمیاں کوں قریبی ہسپتالاں اچ منتقل کر ݙتا ڳئے جتھاں انھاں کوں طبی امداد فراہم کیتی ویندی پئی اے۔ حکومت متاثرہ علاقیاں اچ ہنگامی امدادی سرگرمیاں دا آغاز کر ݙتے اتے عوام توں احتیاطی تدابیر اختیار کرݨ دی اپیل کیتی ڳئی اے۔ حکام دے مطابق ہلاکتاں تے زخمیاں دی تعداد اچ ٻئے اضافے دا خدشہ اے کیونجو کجھ دور دراز علاقیاں توں معلومات ہݨ تئیں موصول تھیندیاں پئن۔