نائب وزیرِ اعظم اسحاق ڈار دی صدارت کفایت شعاری کمیٹی دا اجلاس، اہم فیصلیاں دی منظوری

اسلام آباد۔ 10 جون (اے پی پی) نائب وزیرِ اعظم تے وزیرِ خارجہ سینیٹر محمد اسحاق ڈار بدھ کوں اتھاں ایندھن دے تحفظ تے اضافی کفایت شعاری اقدامات دی نگرانی تے عملدرآمد بارے کمیٹی دے اجلاس دی صدارت کیتی۔ نائب وزیراعظم دے آفس توں جاری تھیوݨ آلے بیان دے مطابق اجلاس اچ مختلف وزارتاں تے ڈویژنز ولوں کجھ کفایت شعاری اقدامات توں استثنیٰ حاصل کرݨ کیتے پیش کیتی ڳئیاں درخواستاں دا جائزہ گھدا ڳیا اتے انھاں دے بارے اچ سفارشات کوں حتمی شکل ݙتی ڳئی۔ اجلاس اچ اے وی فیصلہ کیتا ڳیا جو عوامی سہولت دے پیشِ نظر وزارتِ خارجہ تے ایں دے کوئٹہ، کراچی، پشاور، گجرات تے لاہور اچ قائم رابطہ دفتراں اچ قونصلر تصدیق دی خدمات جمعے دے ݙینھ وی جاری رہسن۔ کمیٹی ٻئی سفارش کیتی جو او اضافی کفایت شعاری اقدامات جنھاں دی معیاد 13 جون 2026 کوں ختم تھیوݨ آلی اے انھاں کوں 30 جون 2026 تئیں توسیع ݙتی ونڄے۔ اجلاس اچ اے فیصلہ وی کیتا ڳیا جو اںج قائم گروسری تے کریانہ اسٹورز دے کاروباری اوقات اچ توسیع کریندے ہوئیں انھاں کوں ہفتے دے سارے ݙینھاں بشمول چھݨچھݨ (ہفتہ) تے آݙتوار (اتوار) رات 10 وڄے تئیں کھلا رکھݨ دی اجازت ݙتی ونڄے۔ اجلاس اچ وفاقی وزراء برائے پیٹرولیم، موسمیاتی تبدیلی تے آئی ٹی تے ٹیلی کام، وزیرِ اعظم دے معاونِ خصوصی برائے خزانہ، نائب وزیرِ اعظم دے معاونِ خصوصی، سیکریٹریز کابینہ، تجارت، پیٹرولیم تے آئی ٹی و ٹیلی کام سمیت وزارتِ خارجہ تے ٻیاں متعلقہ وزارتاں تے ڈویژنز دے سینئر حکام شرکت کیتی۔