وینزویلا اچ ݙو زور دے زلزلیں پاروں 32بندے ہلاک تے 700 زخمی، مزید اموات دا ݙر

کراکس۔25 جون (اے پی پی) وینزویلا اچ ٻدھ دی رات آوݨ آلے ݙو زور دے زلزلیں دے نتیجے اچ گھٹ توں گھٹ 32 بندے ہلاک تے 700 توں ودھ زخمی تھی ڳئن، ڄݙاں جو متاثرہ علاقیں اچ امدادی کارروائیاں جاری ہن۔

شنہوا موجب ملک دی قائم مقام صدر ڈیلسی روڈریگز خمیس دی سویل سرکاری بیان اچ ہلاکتاں تے زخمیاں دی تصدیق کریندے آکھیے جو شمالی ساحلی ریاست “لا گوائرا” ساریں توں زیادہ متاثر تھئی اے، جتھاں درجناں عمارتاں مکمل طور تے ڈھہہ ڳئن ۔

سرکاری ٹیلی ویژن نال خطاب کریندے روڈریگیز لا گوائرا کوں “آفت زدہ علاقہ” قرار ݙتے تے آکھیا جو اتھاں دی صورتحال سنگین اے۔ انھاں ݙسایا جو ہݨ تئیں سامݨے آوݨ آلے اعداد و شمار اچ لا گوائرا ریاست شامل کائنی کیوں جو ایں علاقے اچ مواصلاتی نظام شدید متاثر تھیوݨ پاروں مکمل معلومات نئی مل سڳیاں۔ حکام کوں ݙر اے جو رابطے بحال تھیوݨ دے بعد ہلاکتاں تے زخمیاں دی تعداد اچ مزید ودھارا تھی سڳدے۔متاثرہ علاقیں اچ امدادی ٹیماں ملبے تلوں آئے لوکاں کوں کڈھݨ تے زخمیاں کوں طبی امداد ݙیوݨ اچ مصروف ہن۔