مکہ مکرمہ، قرآن کریم میوزیم اچ قدیم ترین نسخہ وی نمائش کیتے پیش، اے زائرین کوں آپݨے پاسے متوجہ کریندا پئے

مکہ مکرمہ۔30 جون (اے پی پی) عالمِ اسلام دے مقدس ترین شہر مکہ مکرمہ دے حرا کلچرل ڈسٹرکٹ دے قرآن کریم میوزیم اچ موجود نادر قرآنی نسخیاں تے ٻین مخطوطات دے نال ہک قدیم ترین نسخہ وی نمائش کیتے رکھیا ڳئے جیڑھا زائرین کوں آپݨے پاسے متوجہ کریندے۔ سعودی خبر رساں ایجنسی (ایس پی اے) دے مطابق اے نایاب و قدیم ترین نسخہ قازان شہر اچ ہجری 1324 بمطابق 1906 اچ شائع کیتا ڳیا ہئی۔ قرآنی نسخے دے حاشیاں اچ آیتاں دی تشریح وی کیتی ڳئی اے جیڑھی ایں عہد دے علماء دی علمی خدمت دی واضح عکاس اے۔ قرآن کریم دا اے نایاب نسخہ شاہ فیصل ریسرچ اینڈ اسلامک سٹڈی اچ محفوظ اے جئیں کوں میوزیم اچ رکھݨ دا مقصد قرآنی ورثے تے اسلامی تہذیب نال زائرین کوں روشناس کراوݨ اے۔ خیال رہے جو مکہ مکرمہ دے حرا کلچرل ڈسٹرکٹ اچ موجود قرآن کریم میوزیم عالمی سطح تے آپݨی نوعیت دا پہلا میوزیم اے جِتھاں نادر قرآنی نسخے، تاریخی مخطوطات تے نوادرات رکھے ہوئن۔ میوزیم اچ ایجھے نادر نسخے موجود ہن جیڑھے قرآن کریم دی کتابت تے طباعت دے اہم تاریخی مرحلیاں کوں نمایاں کریندن، انھاں کوں جدید انٹرایکٹیو ایگزیبیشن ٹیکنالوجی دے ذریعے موثر بݨایا ڳئے۔