سندھ طاس معاہدہ پاکستان دے 24 کروڑ عوام دی شہ رڳ اے، معاہدے دی یکطرفہ معطلی یا ایں اچ تبدیلی ممکن نئی، عطاء اللہ تارڑ

اسلام آباد۔30 جون (اے پی پی) وفاقی وزیرِ اطلاعات تے نشریات عطاء اللہ تارڑ آکھیا جو سندھ طاس معاہدہ پاکستان دے 24 کروڑ عوام دی شہ رڳ اے جئیں اچ کہیں وی قسم دی یکطرفہ ترمیم، منسوخی یا معطلی ممکن نئی، بھارت ولوں معاہدے کوں یکطرفہ طور تے معطل کرݨ دی ناکام کوششاں کیتی ڳئیاں جئیں دے باعث ایں کوں مختلف عالمی فورمز تے شرمندگی دا سامنا کرݨا پئے، پاکستان پاݨی دے حق دے تحفظ کیتے ہر سطح تے اقدامات کریسی۔ اے ڳالھیں انھاں منگل کوں اتھاں جناح کنونشن سینٹر اچ ’’سندھ طاس معاہدہ، امن تے علاقائی استحکام دا اہم ذریعہ‘‘ دے موضوع تے منعقدہ بین الاقوامی سیمینار دے افتتاحی سیشن نال خطاب کریندیں ہوئیں کیتا۔ ایں موقع تے وزیرِ دفاع خواجہ محمد آصف، سابق وفاقی وزیر خرم دستگیر، سابق صدر نیشنل ڈیفنس یونیورسٹی لیفٹیننٹ جنرل (ر) عامر ریاض، انسٹیٹیوٹ آف ریجنل سٹڈیز دے صدر ایمبیسیڈر جوہر سلیم، سابق وفاقی وزیرِ قانون احمد بلال صوفی، انڈس واٹر ٹریٹی کمشنر سید مہر علی شاہ سمیت بین الاقوامی آبی ماہرین وی موجود ہن۔ وفاقی وزیرِ اطلاعات آکھیا جو اج اساں محض سندھ طاس معاہدے تے ڳالھ نئی کریندے پئے بلکہ پاکستان دے 24 کروڑ توں زیادہ عوام دی شہ رڳ تے ڳالھ کریندے پئیوں، وادیِ سندھ دی تہذیب اساݙی قومی شناخت دی بنیاد تے بطورِ قوم ساݙی سنڄاݨ اے۔ اساں ایں عظیم تہذیب دے وارث ہیسے، اساں دریائے سندھ تے ایں دے معاون دریاواں دے کِندھیاں (کناریاں) تے وسݨ آلی ہک قوم ہیسے۔ انھاں آکھیا جو پاݨی ای زندگی اے تے دریائے سندھ پاکستان کوں زندگی عطا کیتی اے۔ انھاں آکھیا جو دریائے سندھ اساݙی شہ رڳ اے تے پاکستان دے 24 کروڑ عوام کوں ایں دے پاݨی تے ہک ناقابلِ تنسیخ حق حاصل اے۔ انھاں آکھیا جو پاکستان کیتے پاݨی محض ہک وسیلہ نئی بلکہ زندگی دا مسئلہ اے، دریائے سندھ دا آبی نظام صدیاں توں دنیا دیاں قدیم ترین تہذیباں اچوں ہک دی آبیاری کریندا آئے۔ انھاں آکھیا جو گلگت بلتستان دیاں بلند و بالا چوٹیاں توں گھن تے پنجاب تے سندھ دے زرخیز میداناں تئیں اے پاݨی اساکوں جغرافیہ تے تاریخ نال جوڑیندا آئے۔ پاکستان دی کہانی کئی حوالیاں توں دریائے سندھ دی ای کہانی اے۔ وفاقی وزیرِ اطلاعات آکھیا جو 1960ء دا سندھ طاس معاہدہ بین الاقوامی تعلقات اچ ہک منفرد مقام رکھیندے۔ ورلڈ بینک دی سرپرستی اچ طے پاوݨ آلا اے معاہدہ جنگاں، سیاسی اتار چڑھاؤ تے طویل عرصے دی کشیدگی دے باوجود قائم و دائم رہیے۔ انھاں آکھیا جو چھی ݙہاکیاں توں زائد عرصے تئیں ایں معاہدے دی مضبوطی ایں حقیقت دی عکاس اے جو تعاون، مکالمہ تے بین الاقوامی وعدیاں دی پاسداری ہی امن دا واحد پائیدار راہ اے۔ اے معاہدہ قواعد تے مبنی بین الاقوامی نظام دی ہک نمایاں مثال اے جیڑھا نیک نیتی دے اصول، معاہدیاں دے احترام تے پرامن طریقہ کار نال تنازعات دے حل دی عکاسی کریندے۔ انھاں آکھیا جو اے محض قانونی تصورات نئی بلکہ او بنیاداں ہن جِنھاں تے اعتماد قائم ہوندے۔ وفاقی وزیر آکھیا جو وزیرِ اعظم شہباز شریف، فیلڈ مارشل سید عاصم منیر تے وزیرِ دفاع خواجہ محمد آصف مختلف مواقع تے واضح کیتے جو پاکستان دے عوام کوں دریائے سندھ دے پاݨی تے حق حاصل اے اتے سندھ طاس معاہدے اچ نہ تاں یکطرفہ طور تے ترمیم کیتی ونڄ سڳدی اے نہ ایں کوں منسوخ، معطل یا غیر موثر کیتا ونڄ سڳدے۔ وفاقی وزیرِ اطلاعات آکھیا جو ایں وقت ڄݙاں ماحولیاتی تبدیلی دی رفتار تیز تھیندی پئی اے، گلیشیئرز غیر معمولی رفتار نال پگھلدے پئن اتے پاݨی دی کمی اساݙے عہد دا ہک وݙا چیلنج بݨدی پئی اے، ایں معاہدے دے تحفظ دی ضرورت مزید ودھ ڳئی اے۔ وفاقی وزیر آکھیا جو پاݨی کوں روکݨ یا بند کرݨ دی کوئی وی کوشش ہمیشہ ناکام تھیندی اے کیونجو پاݨی آپݨآ راہ خود بݨیندے۔ انھاں آکھیا جو پاݨی کوں بطورِ ہتھیار استعمال کرݨا یا طے شدہ انتظامات اچ یکطرفہ تبدیلی دی کوشش نہ صرف علاقائی امن و استحکام کوں نقصان ݙیندی اے بلکہ بین الاقوامی قانون دے وسیع تر فریم ورک کوں وی متاثر کریندی اے۔ فاقی وزیرِ اطلاعات آکھیا جو دریائے سندھ دا پاݨی ہزاراں سال توں وہندا پئے، ایں تبدیلیاں دا مشاہدہ کیتے، اے اج وی بلا تعطل زندگی کوں سہارا ݙیندا پئے۔ انھاں آکھیا جو اساݙی مشترکہ ذمہ داری اے جو اساں اِنھاں پاݨیاں کوں آوݨ آلیاں نسلاں کیتے امن تے مشترکہ خوشحالی دی علامت دے طور تے برقرار رکھوں۔ انھاں نے انسٹیٹیوٹ آف ریجنل اسٹڈیز تے تمام شراکت داراں کوں ایں سیمینار دے انعقاد تے خراجِ تحسین پیش کیتا۔