پاکستان کوں مسائل حل کرݨ، ملازمتاں پیدا کرݨ تے ملک دی ترقی اچ حصہ پاوݨ آلے گریجویٹس دی لوڑھ اے، چیئرمین سینیٹ

پشاور۔ 30 جون (اے پی پی) چیئرمین سینیٹ سید یوسف رضا گیلانی آکھیا جو پاکستان کوں مسائل حل کرݨ، ملازمتاں پیدا کرݨ تے ملک دی ترقی اچ حصہ پاوݨ آلے گریجویٹس دی لوڑھ اے، امریکا تے ایران وچال امن اچ کردار ادا کرݨ تے سول تے عسکری قیادت مبارکباد دی مستحق اے۔ اے ڳالھیں انھاں منگل کوں غلام اسحاق خان انسٹیٹیوٹ صوابی دے سالانہ کانووکیشن اچ بطورِ مہمانِ خصوصی خطاب کریندیں ہوئیں کیتا۔ چیئرمین سینیٹ یوسف رضا گیلانی آکھیا جو صدر آصف علی زرداری ولوں غلام اسحاق خان انسٹیٹیوٹ دے سالانہ کانووکیشن اچ تہاݙے وچال موجودگی میݙے کیتے اعزاز دی ڳالھ اے، سارے گریجویٹ ٻݨݨ آلیاں کوں مبارکباد پیش کرینداں، اے کامیابی تہاݙی محنت دا نتیجہ اے۔ تہاݙے والدین تے اساتذہ کوں وی دل دی گہرائیاں توں مبارکباد پیش کرینداں جِنھاں پاروں تساں کامیابی دا اے پندھ کیتے۔ انھاں آکھیا جو ایں عظیم تعلیمی ادارے دا پاکستان اچ اعلیٰ تعلیم دے فروغ اچ اہم کردار اے، اے انتہائی قابلِ فخر ڳالھ اے جو اے ادارہ کمپیوٹنگ، انجینئرنگ، سائنس، ٹیکنالوجی تے مینجمنٹ دے میدان اچ صفِ اول دا کردار ادا کریندا پئے۔ انھاں آکھیا جو غلام اسحاق خان انسٹیٹیوٹ دا نالج اکانومی دے فروغ اچ کلیدی کردار اے، او ممالک جیڑھے علم کوں اہمیت ݙیندن او اڳوں وددھدن اتے جیڑھے ممالک دورِ جدید دے تقاضیاں دے مطابق علم دے میدان اچ ٻیاں تے انحصار کریندن او پِچھوں رہ ویندن۔ انھاں آکھیا جو پاکستان دے چیلنجز واضح ہن، اساکوں انحصار دی بجائے پیداوار تے توجہ ݙیوݨی پوسی، انوویشن دی پاسے ونڄݨا پوسی اتے ترقی تے توجہ مرکوز کرݨی پوسی جئیں اچ غلام اسحاق خان انسٹیٹیوٹ جیہے اداریاں دا اہم کردار اے۔ انھاں آکھیا جو یونیورسٹیاں دی سنڄاݨ فارغ التحصیل طلبا دی تعداد توں نئی بلکہ جدید دور دے تقاضیاں دے مطابق ریسرچ توں تھیندی اے۔انھاں آکھیا جو ڄݙاں او وزیرِ اعظم ہن تاں تعلیم انھاں دی ترجیحات اچ سرفہرست رہی، اساں تعلیم دے شعبے اچ سرمایہ کاری کیتی تے اج بطورِ چیئرمین سینیٹ تعلیم، سائنس، ٹیکنالوجی تے ریسرچ کوں فروغ ݙیوݨ کیتے پرعزم ہاں۔ انھاں آکھیا جو انسٹیٹیوٹ دے کانووکیشن کیتے اے ہال کافی نئی ، میں تجویز ݙینداں جو اڳلا کانووکیشن اسلام آباد دے کانووکیشن ہال اچ منعقد کیتا ونڄے۔ایں توں پہلے چیئرمین سینیٹ انسٹیٹیوٹ دے فارغ التحصیل طلبا اچ اسناد ونڈیاں تے بہترین کارکردگی دا مظاہرہ کرݨ آلیاں کوں میڈلز نال نوازیا۔ ایں موقع تے گورنر خیبر پختونخوا فیصل کریم کنڈی، سلیم سیف اللہ خان، فیکلٹی ممبران تے ٻئے حکام وی موجود ہن۔ ایں توں پہلے انسٹیٹیوٹ پجݨ تے چیئرمین سینیٹ دا پرجوش استقبال کیتا ڳیا۔