سندھ طاس معاہدہ دی بحالی دے بغیر پاکستان تے بھارت وچال پائیدار امن نئی تھی سڳدا، بلاول بھٹو زرداری

اسلام آباد۔30 جون (اے پی پی) پاکستان پیپلز پارٹی دے چیئرمین بلاول بھٹو زرداری آکھیا اے جو سمندری گزرگاہیں یا آبی وسائل کوں بطورِ ہتھیار استعمال کرݨ عالمی امن کیتے خطرناک رجحان اے، سندھ طاس معاہدہ دی بحالی دے بغیر پاکستان تے بھارت وچال پائیدار امن ممکن نئی، پاکستان دے آبی حقوق کوں نقصان ݙیوݨ دی ہر کوشش دا قومی سطح تے جواب ݙتا ویسے۔ اے ڳالھیں انھاں منگل کوں سندھ طاس معاہدہ نال متعلق بین الاقوامی سیمینار نال خطاب کریندیں ہوئیں کیا۔ چیئرمین پاکستان پیپلز پارٹی آکھیا جو پاݨی صرف جغرافیہ نئی بلکہ خوراک، مستقبل تے زندگی دا سوال اے، دنیا کوں احساس تھی ڳئے جو پاݨی دے وسائل عالمی سیاست تے سلامتی دا مرکزی مسئلہ بݨ ڳئن۔ بلاول بھٹو زرداری آکھیا جو جینویں آبنائے ہرمز دی بندش عالمی معیشت کوں متاثر کریندی اے، ایں طرحاں دریائے سندھ دا پاݨی پاکستان دی زندگی دی ضمانت اے، سمندری گزرگاہ یا آبی وسائل کوں بطورِ ہتھیار استعمال کرݨا عالمی امن کیتے خطرناک رجحان اے، سندھ طاس معاہدہ دی بحالی دے بغیر پاکستان تے بھارت دے درمیان پائیدار امن ممکن نئی۔ انھاں آکھیا جو پاکستان جنگ بندی دی شرائط تے عمل کیتا جڈانجو بھارت آپݨے وعدیاں دی مکمل پاسداری نہیں کیتی، بلاول بھٹو زرداری آکھیا جو سندھ، جہلم تے چناب دے پاݨی تے پاکستان دا حق بین الاقوامی معاہدے دے تحت تسلیم شدہ اے، کروڑاں عوام دے حقِ آب دے تحفظ تے پوری پاکستانی قوم متحد اے، پاݨی دا سیاسی دباؤ یا بطورِ ہتھیار استعمال بین الاقوامی قوانین تے معاہدیاں دے منافی اے۔