مکہ مکرمہ، بیت اللہ شریف کوں غُسل ݙیوݨ دی تقریب ترائے وݙے مرحلیاں اچ مکمل

مکہ مکرمہ۔1 جولائی (اے پی پی) عالمِ اسلام دے مقدس ترین مقام بیت اللہ شریف کوں غُسل ݙیوݨ دی تقریب ترائے وݙے مرحلیاں اچ مکمل تھئی جئیں اچ حد درجے دی احتیاط تے باریک بینی نال کم گھدا ڳیا جیڑھا ایں عظیم المرتبت مقام تے ایں دے احترام دا اظہار اے جیڑھا اللہ دے گھر نال وابستہ اے۔ سعودی پریس ایجنسی دے مطابق کعبۃ اللہ دے غُسل اچ 15 لیٹر آبِ زمزم، 15 لیٹر عرقِ گلاب، 15 لیٹر روغنِ گلاب تے 100 مِلی لیٹر عود دا تیل استعمال تھیندے۔ غُسلِ کعبہ دی تیاری دے اِنھاں ترائے وݙے مرحلیاں اچ پہلے بیت اللہ کوں غُسل ݙتا ویندے ولا ایں کوں خوشبوواں نال معطر کیتا ویندے اتے تریجھے مرحلے اچ بخُور جلائے ویندن۔ حرمینِ شریفین دی ݙیکھ بھال تے نگہداشت دی جنرل اتھارٹی آکھیا جو غُسلِ کعبہ دے ہر مرحلے تے پہلے توں طے شدہ طریقِ عمل دے عین مطابق کم کیتا ویندے جیڑھا اللہ دے گھر دے شایانِ شان تے مسلماناں دے دلاں اچ ایں جلیل القدر مقام دی انتہائی گہری عقیدت تے احترام دی عکاسی کریندے۔ اتھارٹی دا آکھݨ اے جو غسلِ کعبہ کیتے جیڑھیاں اشیاء درکار ہوندن انھاں دا انتخاب وی ٻہوں ݙیکھ بھال نال تے جدید تے اعلٰی ترین معیار دے مطابق پہلے توں کر ڳھدا ویندے۔