پاکستان تے بھارت وچال قیدیاں دی فہرستاں دا تبادلہ

اسلام آباد۔1 جولائی (اے پی پی) پاکستان تے بھارت ݙوپاسہ قونصلر رسائی دے معاہدے دے تحت سفارتی ذرائع توں ہک ٻئے دی تحویل اچ موجود قیدیاں دی تازہ فہرستاں دا تبادلہ کیتے۔ بدھ کوں دفترِ خارجہ دے مطابق 21 مئی 2008ء کوں تھیوݨ آلے معاہدے دے تحت ݙوہائیں ممالک ہر سال یکم جنوری تے یکم جولائی کوں قیدیاں دی فہرستاں دا تبادلہ کرݨ دے پابند ہن۔ پاکستان اسلام آباد اچ بھارتی ہائی کمیشن کوں آپݨی تحویل اچ موجود 250 بھارتی قیدیاں دی فہرست فراہم کیتی جئیں اچ 52 سویلین قیدی تے 198 ماہی گیر شامل ہن۔ ٻئے پاسوں بھارت پاکستان کوں آپݨی جیلاں اچ موجود 439 پاکستانی یا بظاہر پاکستانی قیدیاں دی فہرست ݙتی جئیں اچ 386 سویلین قیدی تے 53 ماہی گیر شامل ہن۔ دفترِ خارجہ دے مطابق پاکستان بھارت تے زور ݙتے جو او سزا مکمل کرݨ آلے 97 پاکستانی قیدیوں جنھاں اچ 64 سویلین قیدی تے 33 ماہی گیر شامل ہن کوں فوری طور تے رہا کر اتے وطن واپس بھیڄے کیونکہ انھاں دی پاکستانی شہریت دی تصدیق تھی چکی اے۔ پاکستان بھارت توں اے مطالبہ وی کیتا جو رہائی تے وطن واپسی دے منتظر تمام پاکستانی تے بظاہر پاکستانی قیدیاں دی حفاظت، سلامتی تے فلاح و بہبود کوں یقینی بݨایا ونڄے۔ بیان اچ ٻیا آکھیا ڳیا جو پاکستان بھارت توں بظاہر پاکستانی قیدیاں کوں جلد از جلد قونصلر رسائی فراہم کرݨ دا وی مطالبہ کیتے تاکہ انھاں دی شہریت دی بروقت تصدیق ممکن تھی سڳے۔ دفترِ خارجہ دے مطابق حکومتِ پاکستان تمام پاکستانی قیدیاں دی جلد وطن واپسی کوں یقینی بݨاوݨ کیتے آپݨی کوششاں جاری رکھیسی۔