وزیرِاعظم دی وفاقی وزیرِموسمیاتی تبدیلی تے چیئرمین این ڈی ایم اے کوں سارے صوبیں بشمول آزاد کشمیر تے گلگت بلتستان دا ہنگامی دورہ کرݨ دی ہدایت

اسلام آباد۔1 جولائی (اے پی پی) وزیرِاعظم محمد شہباز شریف موسمی تغیرات دے خطرے نال نبڑݨ کیتے وفاقی تے صوبائی سطح تے موثر تے جامع تعاون کوں ناگزیر قرار ݙیندے ساوݨ دی پیشگی تیاری کیتے وفاقی وزیرِموسمیاتی تبدیلی تے چیئرمین این ڈی ایم اے کوں سارے صوبیں بشمول آزاد کشمیر و گلگت بلتستان دا ہنگامی دورہ کرݨ دی ہدایت کیتی اے۔وزیرِاعظم دفتر دے میڈیا ونگ توں جاری بیان موجب وزیرِاعظم محمد شہباز شریف دی زیرِ صدارت ساوݨ سیزن دی پیشگی تیاری تے موسمیاتی تغیر تے ماحولیاتی خطرات توں بچݨ دے نظام تے جائزہ اجلاس تھیا۔ اجلاس اچ وزیرِدفاع خواجہ محمد آصف، وفاقی وزیرِ خزانہ محمد اورنگزیب، وفاقی وزیرِ منصوبہ بندی و ترقی احسن اقبال، وفاقی وزیرِ اطلاعات و نشریات عطاء اللہ تارڑ، وفاقی وزیرِ پاور ڈویژن سردار اویس احمد لغاری، وفاقی وزیرِ موسمیاتی تبدیلی مصدق ملک، وفاقی وزیرِ انفارمیشن ٹیکنالوجی شزا فاطمہ، وفاقی وزیرِ قانون اعظم نذیر تارڑ، وزیرِاعظم دے مشیر سیاسی امور رانا ثناء اللہ، وزیرِ مملکت خزانہ اظہر بلال کیانی، چیئرمین این ڈی ایم اے، چیئرمین واپڈا تے سارے صوبیں دے چیف سیکرٹریز تے ٻئے متعلقہ سرکاری اداریں دے عہدیداراں شرکت کیتی۔اجلاس نال خطاب کریندے وزیرِاعظم آکھیا جو پاکستان موسمیاتی تبدیلیاں دے مضر اثرات توں متاثرہ ملکاں اچ شامل اے، موسمی تغیرات دے قومی سطح دے خطرے نال نبڑݨ کیتے وفاقی تے صوبائی سطح تے موثر تے جامع تعاون ناگزیر اے۔ انھاں وفاقی وزیرِ موسمیاتی تبدیلی تے چیئرمین نیشنل ڈیزاسٹر مینجمنٹ اتھارٹی (این ڈی ایم اے) کوں سارے صوبیں، آزاد کشمیر، گلگت بلتستان دا ایں ہفتے ہنگامی دورہ کرݨ دی ہدایت کیتی تاں جو ساوݨ دی پیشگی تیاری مکمل کیتی ونڄ سڳے۔ انھاں وفاقی وزیرِ منصوبہ بندی و ترقی دی زیرِ نگرانی این ڈی ایم اے تے ٻئے متعلقہ وفاقی وزارتاں تے مشتمل ایمرجنسی رسپانس کمیٹی تشکیل ݙیوݨ دی ہدایت کیتی جیڑھی متعلقہ صوبائی اداریں توں عملی تعاون کیتے کم کریسی۔ وزیرِ اعظم دی ہدایت تے ایمرجنسی رسپانس کمیٹی ہفتہ وار ملاقاتاں کریسی۔انھاں ہدایت کیتی جو وفاقی وزیرِخزانہ ایمرجنسی رسپانس کمیٹی اچ ساوݨ دی ممکنہ تباہی دی صورت اچ ہنگامی فنڈ دی تشکیل کیتے پیشگی تیاری مکمل کرن۔ وزیرِاعظم آکھیا جو غیر ملکی اداریں دی مالی معاونت دے تحت منصوبے وی قومی و مقامی اداریں دی استعداد ودھاوݨ کیتے استعمال ہووݨے چاہیدن۔ وزیرِاعظم ݙسایا جو قومی آبی تحفظ و سلامتی کیتے وفاقی حکومت ایں سال مالی بجٹ اچ آبی منصوبیں دی جلد تکمیل کیتے 330 ارب روپے دی اضافی رقم مختص کیتی اے۔ وزیرِاعظم ہدایت کیتی جو ماضی دے تجربیں دی روشنی اچ ایں سال ساوݨ سیزن اچ ممکنہ چھل دی صورتحال تے خطرات توں بچݨ کیتے اقدامات جامع روڈ میپ دے تحت ترتیب ݙتے ونڄن، سارے صوبے مقامی سطح تے خطرے توں ݙوچار اضلاع اچ دریاواں دی گزرگاہواں تے چھل دے ممکنہ رستیں اچ تجاوزات تے ٻئے مسئلیں دا پیشگی موثر حل یقینی بݨاون، ساوݨ دے دوران سارے ادارے اپݨی مکمل ادارہ جاتی و تکنیکی استعداد کار کوں عوام دی سہولت کیتے بروئے کار گھن آون۔اجلاس اچ چیئرمین این ڈی ایم اے اڄوکے سال ساوݨ دی پیشگی تیاری تے ممکنہ مینھ تے چھل دی صورتحال تے موسمیاتی تغیر دے رحجان تے بریفنگ ݙتی۔ وزیرِاعظم کوں این ڈی ایم اے دی بریفنگ اچ ݙسایا ڳیا جو دنیا اچ اڄوکے سال گرمی دی شدید لہر تے غیر معمولی موسمیاتی تغیرات دے امکانات واضح ہن، پاکستان اچ وی گرمی دی شدید لہر تے جولائی دے مہینے اچ غیر معمولی مینھ متوقع ہن جنھاں کیتے مجوزہ حکمتِ عملی دے تحت سارے درکار انتظامات کیتے ویندے پئن۔ اجلاس اچ وزیرِاعظم موسمیاتی تغیر تے ساوݨ دی ممکنہ تباہی توں یقینی بچݨ کیتے سارے وفاقی تے صوبائی متعلقہ وزارتاں تے اداریں کوں مکمل ہم آہنگی دے نال موثر تعاون تے جامع حکمتِ عملی دے تحت کم کرݨ دی ہدایت کیتی۔ وزیراعظم آکھیا جو موسمیاتی تغیرات جیہڑے قومی خطرات نال چنڳے طریقے نال نبݨݨ کیتے سانجھے تعاون تے ہنگامی اقدامات ناگزیر ہن۔