پاکستان دی اصل طاقت ایٹم بم نی نوجوان نسل اے، وفاقی وزیراحسن اقبال

اسلام آباد۔ 01 جولائی (اے پی پی) وفاقی وزیر منصوبہ بندی، ترقی و خصوصی اقدامات پروفیسر احسن اقبال آکھیے جو پاکستان دی اصل طاقت ایں دا ایٹمی پروگرام نی بلکہ باصلاحیت نوجوان نسل اے، کیوں جو قوماں دی حقیقی ترقی معدنی وسائل نال نی بلکہ انسانی وسائل، معیاری تعلیم تے پالیسیاں دے تسلسل نال تھیندی اے۔ او اتھاں اوورسیز پاکستانیز سمر سکالرز پروگرام 2026 دی افتتاحی تقریب توں خطاب کریندے پئے ہن۔انھاں ݙسایا جو ایں پروگرام کیتے دنیا دے 54 ملکاں توں تقریباً ݙو ہزار درخواستاں ملیاں، جنھاں اچوں میرٹ تے 45 اوورسیز پاکستانی طلبہ کوں منتخب کیتا گئے۔ ایں سال پروگرام اچ پاکستانی طلبہ دے نال بنگلہ دیش، انڈونیشیا تے قازقستان دے تِرائے غیر ملکی سکالرز وی شامل ہن۔ اے نوجوان وزارتِ منصوبہ بندی دی سینئر قیادت نال رل تے فائیو ایز (5Es) فریم ورک یعنی برآمدات، توانائی، ماحولیات، ای پاکستان تے مساوات دے تحت قومی ترقی کیتے نویاں تجویزاں ݙیسن۔احسن اقبال آکھیا جو 2017ء اچ عالمی اداریں پیش گوئی کیتی ہئی جو پاکستان 2030ء تئیں دنیا دیاں 20 وݙیاں معیشتاں اچ شامل تھی سڳدے، پر بعد اچ سیاسی تبدیلی پاروں ملک معاشی بحران دا شکار تھیا۔ 2022ء اچ موجودہ حکومت سیاست دے بجائے ریاست کوں بچاوݨ کوں ترجیح ݙتی تے سخت فیصلے کر تے معیشت کوں سنبھالیا۔ انھاں آکھیا جو پاکستان دی 60 فیصد آبادی نوجواناں تے مشتمل اے، ایں سانڳے نصاب کوں جدید ٹیکنالوجی تے عالمی مارکیٹ دے تقاضیں موجب بݨاوݨ دی سفارش کیتی گئی اے تاں جو تعلیم براہِ راست روزگار نال جڑسڳے۔