چیئرمین سینیٹ  یوسف رضا گیلانی نال پاکستان اچ بلغاریہ دی سفیر آئرینا گیناڈیوا گانچیوا دی ملاقات

اسلام آباد۔ 01 جولائی (اے پی پی) چیئرمین سینیٹ سید یوسف رضا گیلانی نال پاکستان اچ بلغاریہ دی سفیر آئرینا گیناڈیوا گانچیوا پارلیمنٹ ہاؤس اچ ملاقات کیتی۔ ملاقات اچ ݙو طرفہ تعلقات، پارلیمانی تعاون، اقتصادی رابطے تے عوامی سطح تے تعلقات کوں وسعت ݙیوݨ تے ڳالھ مہاڑ کیتی ڳئی۔ چیئرمین سینیٹ بلغاریہ دی سفیر کوں پاکستان اچ اپݨی سفارتی ذمہ واریاں کامیابی نال پورا کرݨ تے مبارخ ݙتی تے انھاں دی خدمات دی تعریف کیتی۔ یوسف رضا گیلانی بلغاریہ کوں شینگن ایریا دی مکمل رکنیت حاصل کرݨ تے مبارخ ݙتی تے او ای سی ڈی (OECD) دی رکنیت کیتے پاکستان دی حمایت دا اعادہ کیتا۔ انھاں ݙوہیں ملکاں وچال تجارت تے سرمایہ کاری کوں ودھاوݨ کیتے “پاکستان بلغاریہ بین الحکومتی اقتصادی تعاون کمیشن” دے تریجھے اجلاس کوں وقتی سݙاوݨ دی امید ظاہر کیتی۔ انھاں جی ایس پی پلس (GSP+) اسٹیٹس دے حوالے نال بلغاریہ دی حمایت دا شکریہ وی ادا کیتا۔چیئرمین سینیٹ سفیر کوں انٹر پارلیمانی اسپیکرز کانفرنس (ISC) دے بارے ݙسایا تے آکھیا جو پاکستان خطے اچ امن تے امریکہ و ایران دے وچال سفارتی ڳالھ مہاڑ کیتے مثبت کردار ادا کیتے۔ انھاں اپݨے دورِ وزارتِ عظمیٰ دا حوالہ ݙیندے آکھیا جو سابق بھارتی وزیرِاعظم انھاں کوں “امن دا سفیر” قرار ݙتا ہئی۔ بلغاریہ دی سفیر پاکستان دی امن کیتے کوششاں دی تعریف کیتی۔ چھیکڑ اچ چیئرمین سینیٹ سینیٹ دی طرفوں تریمتاں، اقلیتاں تے نینگراں کوں انٹرنشپ پروگرامز دے ذریعے بااختیار بݨاوݨ دے اقدامات تے وی روشنی پاتی۔