این ڈی ایم اے دا آندے ہفتے دے دوران ممکنہ خطرے دے حوالے نال الرٹ جاری

اسلام آباد۔1 جولائی (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) دے نیشنل ایمرجنسیز آپریشن سینٹر (این ای او سی) آندے ہفتے دے دوران ممکنہ خطرے دے حوالے نال الرٹ جاری کرݙتے۔این ڈی ایم اے دے میڈیا ونگ توں جاری کیتے ڳئے بیان موجب این ای او سی سارے ممکنہ خطرے دی پیشگی تشخیص تے متعلقہ اداریں تئیں وقتی معلومات ݙیوݨ یقینی بݨیندا پئے۔ گلگت بلتستان، خیبرپختونخوا تے آزاد کشمیر دے گلیشیئر دے نیڑے علاقیں کیتے گلیشیائی جھیلاں دے پھٹݨ پاروں چھل دا ݙر اے ۔ مسلسل ودھدا درجہ حرارت تے اتلے علاقیں اچ متوقع مینھ پاروں گلیشیئر پگھلݨ دا عمل تکھا تھیوݨ دا امکان اے۔ گلیشیائی جھیلاں دے پھٹݨ پاروں اچاچیت چھل، ملبے دے ریلے، لینڈ سلائیڈنگ تے مٹی دے بِھکل ڈھݨ دے دا خطرہ تھی سڳدے۔ ہنزہ، نگر، غذر، سکردو، شگر، گانچھے، خرمنگ، استور، دیامر، اپر و لوئر چترال، سوات تے ٻئے گلیشیئر نال منسلک وادیاں اچ خصوصی احتیاط ورتݨ دی ہدایت کیتی ڳئی اے۔درجہ حرارت اچ ودھارے تے متوقع مینھ پاروں ہسپر-ہوپر نالہ اچ پاݨی دے وہݨ اچ نمایاں ودھارے دا امکان اے۔ مقامی سطح تے اچانک چھل، ملبے دے ریلے تے دریائی کناریں دے کٹاؤ دا ݙر ظاہر کیتا ڳئے۔ این ای او سی یکم توں 4 جولائی 2026ء تئیں ممکنہ صورتحال دے حوالے نال وی الرٹ جاری کر ݙتے۔ یکم توں 4 جولائی دے دوران ساوݨ سسٹم تے مغربی ہوائیں دے زیرِ اثر پہاڑی ندی نالیں تے موسمی برساتی نالیں اچ پاݨی دے وہݨ اچ اچانک ودھارا متوقع اے۔ خیبرپختونخوا، پنجاب، بلوچستان، آزاد کشمیر تے گلگت بلتستان دے مختلف علاقیں اچ اچانک چھل دی صورتحال دا ݙراے۔خیبر پختونخوا دے چارسدہ، نوشہرہ، پشاور، مردان، صوابی، کوہاٹ، بنوں، لکی مروت، دیرہ اسماعیل خان، مانسہرہ، ایبٹ آباد، ہری پور، سوات، دیر، چترال، شانگلہ، بونیر، بٹگرام، تورغر تے کوہستان دے پہاڑی ندی نالیں اچ پاݨی دے وہݨ اچ ودھارا تھی سڳدے۔ پنجاب دے راولپنڈی، اتک، جہلم، چکوال، میانوالی، بھکر، خوشاب، سرگودھا، فیصل آباد، جھنگ، سیالکوٹ، نارووال، گجرات، گوجرانوالہ، لاہور، شیخوپورہ، حافظ آباد تے منڈی بہاؤالدین دے نشیبی علاقیں تے برساتی نالیں اچ چھل دی صورتحال متوقع اے۔ بلوچستان دے ژوب، شیرانی، موسیٰ خیل، بارکھان، سبی، کوہلو، ڈیرہ بگٹی، لورالائی تے گردونواح اچ مقامی سطح تے اچانک چھل دی صورتحال دا امکان اے۔ آزاد کشمیر تے گلگت بلتستان دے پہاڑی علاقیں اچ شدید مینھ پاروں ندی نالیں اچ طغیانی تے مقامی چھل دا ݙر اے برقرار اے۔شہری علاقیں اچ زور دے مینھ پاروں نشیبی علاقے زیرِ آب آوݨ تے ٹریفک دی روانی متاثر تھیوݨ دا امکان اے۔ این ڈی ایم اے متعلقہ اداریں کوں پیشگی حفاظتی اقدامات، نکاسیِ آب دے انتظامات تے ہنگامی مشینری دی تیاری یقینی بݨاوݨ دی ہدایت جاری کر ݙتی اے۔ سڑکاں، پُلاں، آبپاشی دے نظام تے نیڑے انفراسٹرکچر کوں ضیان تھیݨ دا ݙر اے ۔ نشیبی علاقیں تے دریا دے کنارے آبادیاں کوں محتاط رہݨ تے غیر ضروری نقل و حرکت توں گریز دی ہدایت کیتی ڳئی اے۔ متعلقہ اداریں کوں دریا وہݨ تے گلیشیائی جھیلاں دی مسلسل نگرانی یقینی بݨاوݨ دی ہدایت کیتی ڳئی اے۔ عوام توں اپیل کیتی ڳئی اے جو او سرکاری ہدایات تے وقتی جاری تھیوݨ آلی وارننگز تے عمل کرن۔ عوام توں گزارش اے جو او این ڈی ایم اے، پی ڈی ایم ایز تے مقامی انتظامیہ دی جاری کردہ ہدایات تے حفاظتی ہدایات تے عمل کرن۔ متوقع موسمی صورتحال، ممکنہ خطرات تے حفاظتی تدابیر دے حوالے نال مستند معلومات کیتے پاک این ڈی ایم اے ڈیزاسٹر الرٹ ایپ توں رہنمائی گھنن۔