وزیرِاعظم محمد شہباز شریف دی چارے صوبیں، گلگت بلتستان تے آزاد جموں و کشمیر اچ دانش سکولاں دی تعمیر وقتی مکمل کرݨ دی ہدایت

اسلام آباد۔1 جولائی (اے پی پی) وزیرِاعظم محمد شہباز شریف چارے صوبیں، گلگت بلتستان تے آزاد جموں و کشمیر اچ دانش سکولاں دی تعمیروقتی مکمل کرݨ دی ہدایت کریندے آکھیے جو دانش سکول تے دانش یونیورسٹی ٻہوں اہم قومی اثاثہ ہن، ملک اچ دانش سکولاں تے اسلام آباد اچ دانش یونیورسٹی دی تعمیر قوم دے تابناک مستقبل کیتے بہترین سرمایہ کاری اے۔ وزیرِاعظم دفتر دے میڈیا ونگ توں جاری بیان موجب اے ڳالھ انہاں ملک اچ دانش سکولاں تے دانش یونیورسٹی دے قیام متعلق جائزہ اجلاس دی صدارت کریندے آکھی۔ اجلاس اچ وفاقی وزراء اعظم نذیر تارڑ، احسن اقبال، عطاء اللہ تارڑ، خالد مقبول صدیقی تے متعلقہ اداریں دے اعلیٰ افسراں شرکت کیتی۔وزیرِاعظم ہدایت کیتی جو مظفر آباد اچ دانش یونیورسٹی دا ٹیک کیمپس بݨایا ونڄے، چارے صوبیں، گلگت بلتستان تے آزاد جموں و کشمیر اچ دانش سکولاں دی تعمیروقتی مکمل کیتی ونڄے، دانش سکولاں دا ڈیزائن علاقائی ثقافت نال ہم آہنگ ہووݨا چاہیدے، دانش سکولاں تے یونیورسٹی اچ تدریسی تے ٻئے عملے دی بھرتی خالصتاً میرٹ تے کیتی ونڄے۔ وزیرِاعظم دانش سکولاں دی تعمیر دے حوالے نال تکھی پیشرفت تے وفاقی وزارتِ تعلیم و پیشہ ورانہ تربیت دی ٹیم دی تعریف کیتی۔اجلاس اچ وزیرِاعظم کوں خیبر پختونخوا، سندھ، بلوچستان، گلگت بلتستان، آزاد جموں و کشمیر تے اسلام آباد اچ 27 دانش سکولاں تے اسلام آباد اچ دانش یونیورسٹی دی تعمیر دی پیشرفت دا ݙسایا ڳیا۔ اجلاس کوں ݙسایا ڳیا جو دانش سکول کری اسلام آباد دی تعمیرمکمل تھی چکی اے تے سکول اچ تدریس دا آغاز تھی چکیے، باغ، بھمبر، سلطان آباد، گانچھے تے استور اچ دانش سکولاں دی تعمیر مکمل تھیوݨ کوں اے تے اپریل 2027ء توں کلاساں شروع تھی ویسن، دانش یونیورسٹی اچ تدریسی عملے دی بھرتی دے عمل دا آغاز کیتا ڳئے، دانش یونیورسٹی اچ 2027ء توں کلاسز دا آغاز تھیسی تے ملک بالخصوص پسماندہ علاقیں توں میرٹ دی بنیاد تے طلباء کوں داخلہ ݙتا ویسی۔