محصولات دے اہداف دا حصول تاریخی کامیابی اے، جدید ٹیکس نظام دا محور ٹیکس دہندگان کوں سہولت ݙیوݨ اے، وزیر خزانہ محمد اورنگزیب

اسلام آباد۔ 01 جولائی (اے پی پی) وفاقی وزیر خزانہ و محصولات سینیٹر محمد اورنگزیب فیڈرل بورڈ آف ریونیو (FBR) دی طرفوں مالی سال 26-2025ء کیتے نظرثانی شدہ سالانہ ٹیکس اہداف کوں کامیابی نال حاصل کرݨ تے ادارے دی کارکردگی دی تعریف کریندے ایں کوں تاریخی کامیابی قرار ݙتے۔ ایف بی آر ہیڈکوارٹرز اچ منعقدہ اجلاس توں خطاب کریندے انھاں آکھیا جو اے کامیابی ٹیم ورک، مسلسل اصلاحات تے عملے دی محنت دا نتیجہ اے۔ وزیرِ خزانہ نے وزیراعظم دی طرفوں وی ایف بی آر دی پوری ٹیم کوں مبارخ پیش کیتی۔وزیرِ خزانہ آکھیا جو گزریل ڈھائی سال دے اصلاحاتی سفر اچ ملک دے ٹیکس محصولات تقریباً ݙوگنے تھئن، جیں نال ملکی معیشت تکڑی تھئی اے۔ ٹیکس اچ ودھارے تے مالیاتی نظم و ضبط پاروں پاکستان اپݨی تاریخ دا کم ترین مالیاتی خسارہ تے ساریں توں وݙا پرائمری سرپلس حاصل کیتے۔ انھاں کسٹمز تے ان لینڈ ریونیو دے شعبیں دی تعریف کریندے آکھیا جو کاروباری سرگرمیاں کوں ودھارا ݙیوݨ کیتے ٹیرف ریلیف ݙیوݨ دے باوجود ٹیکس اچ خاطر خواہ ودھارا تھئے۔ ادارے ایں سال 599 ارب روپے دے ٹیکس ریفنڈز جاری کیتے، جیں اچ چھیکڑی ݙینھ ریکارڈ 13.5 ارب روپے دی ادائیگی وی شامل اے، جیڑھی کاروباری برادری سانڳے حکومت دی سہولت کاری دا ثبوت اے۔محمد اورنگزیب آکھیا جو جدید ٹیکس نظام دا مقصد صرف ٹیکس کٹھا کرݨ نی بلکہ ٹیکس ݙیوݨ آلیں کوں سہولت، شفافیت تے عوامی اعتماد کوں تکڑا بݨاوݨ وی ہووݨا چاہیدے۔ انھاں زور ݙتا جو ٹیکنالوجی، خودکار نظام (Automation) تے مصنوعی ذہانت (AI) دے وسیع استعمال دے ذریعے اختیارات دے ناجائز استعمال تے کرپشن دا خاتمہ کیتا ونڄے۔ انھاں آکھیا جو حکومت دا منظور کیتا ڳیا نواں آپریٹنگ ماڈل ایف بی آر کوں ملک دے بہترین عوامی اداریں اچ شامل کریسی۔ اجلاس توں خطاب کریندے چیئرمین ایف بی آر راشد محمود لنگڑیال بجٹ سازی دے عمل اچ وزارتِ خزانہ، آئی ایم ایف (IMF)، صوبائی حکومتاں تے اتحادی جماعتاں دے تعاون دا شکریہ ادا کیتا۔ انھاں آکھیا جو اہم فیلڈ عہدیں تے ایماندار افسران دی تعیناتی ایں گالھ دا ثبوت اے جو شفافیت برقرار رکھیندے وی ٹیکس کٹھا کیتا ونڄ سڳدے۔ انھاں عزم دا اعادہ کیتا جو مصنوعی ذہانت تے جدید ٹیکنالوجی دی مدد نال پاکستان دا ٹیکس نظام جدید خطوط تے استوار کیتا ویسی۔ چھیکڑ اچ وزیرِ خزانہ نے چیئرمین ایف بی آر تے انھاں دی ٹیم دی خدمات دے اعتراف اچ شرکا توں کھڑے تھی تے تالیاں وڄواوݨ دی درخواست کیتی۔