پاکستان تے سعودی عرب اچ سکیورٹی تعاون دا معاہدہ، وفاقی وزیرِ داخلہ محسن نقوی دا ریاض اچ “911” سنٹر دا دورہ

ریاض۔2 جولائی (اے پی پی) پاکستان تے سعودی عرب ݙوہیں ممالک وچال سٹریٹجک شراکت داری تے دیرینہ برادرانہ تعلقات کوں ٻیا وسعت ݙیوݨ کیتے سکیورٹی دے شعبے اچ ہک اہم مفاہمت دی یادداشت (ایم او یو) تے دستخط کر ݙتن۔ سعودی عرب دے وزیرِ داخلہ شہزادہ عبدالعزیز بن سعود بن نائف ایکس تے آپݨی پوسٹ اچ ݙسایا جو انھاں آپݨٰی اعلیٰ قیادت دی ہدایات دے تحت پاکستانی ہم منصب، وفاقی وزیرِ داخلہ تے انسدادِ منشیات محسن رضا نقوی نال ملاقات کیتی۔ ایں اہم ملاقات دے دوران ݙوہیں رہنماواں ݙوپاسہ سکیورٹی تعاون کوں مضبوط بݨاوݨ دے مشترکہ عزم دا اعادہ کیتا اتے دستخط شدہ معاہدے کوں ݙوہیں برادر ملکاں دے مستحکم تعلقات دا عکاس قرار ݙتے۔ آپݨے ایں دورے دے دوران وفاقی وزیرِ داخلہ محسن نقوی ریاض ریجن اچ واقع جدید ترین “یونیفائیڈ سکیورٹی آپریشنز سنٹر (911)” دا تفصیلی معائنہ وی کیتا۔ انھاں سنٹر دے مختلف شعبیاں دا دورہ کیتا جتھاں انھاں کوں سارے متعلقہ سکیورٹی تے سروسز دے اداریاں دے مابین بہترین ہم آہنگی، روابط تے انضمام کوں برقرار رکھݨ کیتے استعمال کیتی ویندی پئی جدید ترین ٹیکنالوجیز بارے تفصیلی بریفنگ ݙتی ڳئی۔ محسن نقوی شہریاں، مقامی مقیم افراد تے زائرین کیتے ہنگامی رپورٹس تے انتہائی تیز رفتار تے درست ردِعمل (کوئیک رسپانس) کوں یقینی بݨاوݨ کیتے سعودی حکام دی کوششاں تے جدید تکنیکی نظام کوں خاص طور تے سراہیا۔ واضح رہے جو ریاض ریجن دا اے مرکزی آپریشنز سنٹر (911) سعودی عرب دے اہم ترین سکیورٹی انفراسٹرکچر اچ شمار تھیندے، جیہڑا ریاض شہر دے علاوہ خطے دی 22 گورنریٹس (محافظات) کوں آپݨی خدمات ݙیندا پئے۔ ہکی چھت تلے قائم ایں جدید ترین کنٹرول روم اچ 62 آپریشنل ورکنگ یونٹس چووی گھنٹے متحرک رہندن، جیہڑے تمام ہنگامی نوعیت دیاں کالز کوں موصول کر تے فوری کارروائی کوں یقینی بݨیندن۔ سکیورٹی تے ہنگامی خدمات دا اے مربوط نظام سعودی عرب دے “وژن 2030” تے “کوالٹی آف لائف پروگرام” دے اعلیٰ اہداف دے تحت کم کریندا پئے۔