وزیرِ اعظم شہباز شریف 3 توں 5 جولائی تائیں ایران تے ترکیہ دا سرکاری دورہ کریسن، ترجمان دفترِ خارجہ

اسلام آباد۔2 جولائی (اے پی پی) وزیرِ اعظم محمد شہباز شریف 3 توں 5 جولائی تائیں ایران تے ترکیہ دا سرکاری دورہ کریسن۔ ترجمان دفترِ خارجہ طاہر حسین اندرابی خمیس کوں اتھاں پریس بریفنگ اچ آکھیا جو ایں دورے اچ نائب وزیرِ اعظم تے وزیرِ خارجہ سینیٹر محمد اسحاق ڈار، ٻئے وفاقی وزراء سمیت اعلیٰ حکام وی وزیرِ اعظم دے نال ہوسن۔ وزیرِ اعظم محمد شہباز شریف ایران دے مرحوم سپریم لیڈر آیت اللہ سید علی خامنہ ای دی نمازِ جنازہ تے تدفین اچ شرکت کیتے ایران ویسن۔ وزیرِ اعظم پاکستانی عوام تے حکومت دی پاسوں ایرانی قیادت تے سوگوار خانداناں نال تعزیت دا اظہار کریسن تے ایں غم دی گھڑی اچ برادر ایرانی قوم دے نال پاکستان دی آپسی یکجہتی دا اعادہ کریسن۔ بعد اچ وزیرِ اعظم ترکیہ دے صدر رجب طیب اردوان دی دعوت تے استنبول ویسن جتھاں او ݙوہائیں برادر ملکاں وچال ݙوپاسہ تعلقات دے سارت پہلواں تے ڳالھ مہاڑ کریسن جئیں اچ ݙوپاسہ تجارت تے سرمایہ کاری دے فروغ تے خصوصی توجہ ݙتی ویسے۔ ݙوہیں رہنما علاقائی امن و سلامتی بارے وی ڳالھ مہاڑ کریسن۔ استنبول اچ قیام دے دوران وزیرِ اعظم پاکستان دی میزبانی اچ تھیوݨ والی بزنس کانفرنس نال وی خطاب کریسن جئیں دا مقصد خصوصی اقتصادی زونز، توانائی، انفارمیشن ٹیکنالوجی (آئی ٹی) تے نجکاری سمیت ترجیحی شعبیاں اچ پاکستان دی تجارت تے سرمایہ کاری دے مواقع کوں اجاگر کرݨ اے۔ ایں کانفرنس اچ ترکیہ دے ممتاز کاروباری شخصیات تے سرمایہ کاراں دے علاوہ اعلیٰ سرکاری حکام تے ٻئے معزز شرکاء وی شرکت کریسن۔ ایران تے ترکیہ دے اے دورے ݙوہیں برادر ممالک دے نال پاکستان دے تاریخی، ثقافتی تے برادرانہ تعلقات دی عکاسی کریندن۔