اسلام آباد دی ضلعی عدلیہ دے ججاں کیتے نیب دی انسدادِ منی لانڈرنگ تے خصوصی تربیتی نشست

اسلام آباد۔2 جولائی (اے پی پی) قومی احتساب بیورو (نیب) پاکستان اینٹی کرپشن اکیڈمی (پی اے سی اے) اچ اسلام آباد دی ضلعی عدلیہ دے ججز کیتے انسدادِ منی لانڈرنگ، مقدمیں دی تفتیش، قانونی چارہ جوئی تے عالمی فریم ورک دے موضوع تے خصوصی تربیتی نشست تھئی۔ تربیتی پروگرام دا مقصد اینٹی منی لانڈرنگ قوانین دے موثر نفاذ، عدالتی استعداد کار اچ ودھارے تے مالیاتی جرائم نال نبٹݨ کیتے مختلف اداریں وچال تعاون کوں ودھاوݨ ہئی۔نشست دے مہمانِ خصوصی اسلام آباد ہائی کورٹ دے جج جسٹس انعام امین منہاس ہن جݙاں جو چیئرمین نیب لیفٹیننٹ جنرل (ر) نذیر احمد تقریب دا افتتاح کیتا۔ ایں موقع تے ڈپٹی چیئرمین نیب سہیل ناصر، ڈی جی پاکستان اینٹی کرپشن اکیڈمی غلام صفدر شاہ، نیب دے سینئر افسراں تے اسلام آباد دی ضلعی عدلیہ دے ججز وی موجود ہن۔ چیئرمین نیب لیفٹیننٹ جنرل (ر) نذیر احمد اپݨے افتتاحی خطاب اچ آکھیا جو منی لانڈرنگ ملکی معیشت تے چنڳی حکمرانی کیتے سنگین خطرہ اے جیں نال نبٹݨ کیتے تفتیشی اداریں، پراسیکیوٹرز، مالیاتی اداریں تے عدلیہ وچال موثر ہم آہنگی ناگزیر اے۔ انھاں جدید مالیاتی جرائم روکݨ کیتے پیشہ ورانہ مہارت تے جدید ٹیکنالوجی دے استعمال دے عزم دا اعادہ کیا۔ڈپٹی چیئرمین نیب سہیل ناصر اینٹی منی لانڈرنگ ایکٹ 2010ء دی مختلف شقاں، قانون نافذ کرݨ آلے اداریں دے کردار، تجارتی بنیاداں تے منی لانڈرنگ، شیل کمپنیاں تے کرپٹو کرنسی دے غلط استعمال جیھے موضوعات تے تفصیلی بریفنگ ݙتی۔ انھاں منی لانڈرنگ توں حاصل شدہ اثاثیں دی ضبطی تے بحقِ سرکار ضبط کرݨ متعلق عدالتاں دے اختیارات تے وی روشنی پاتی۔ نیب دے سپیشل انویسٹی گیشن ڈویژن دے ڈائریکٹر جنرل محمد طاہر فنانشل ایکشن ٹاسک فورس (FATF) تے اقوام متحدہ دے انسدادِ بدعنوانی کنونشن (یو این سی اے سی) دے تحت عالمی اینٹی منی لانڈرنگ فریم ورک، متوازی مالیاتی تحقیقات تے چوری شدہ اثاثیں دی واپسی کیتے بین الاقوامی تعاون دے طریقہ کار تے ڳالھ کیتی ۔ فنانشل مانیٹرنگ یونٹ دی ماسٹر ٹرینر نور السحر پاکستان دے فنانشل انٹیلی جنس یونٹ دے کردار، مشکوک ٹرانزیکشن رپورٹس (ایس ٹی آرز) تے goAML پلیٹ فارم دی اہمیت تے بریفنگ ݙیندیں ݙسایا جو انٹیلی جنس تے مبنی تحقیقات کامیاب استغاثہ اچ اہم کردار ادا کریندن۔اختتامی خطاب اچ اسلام آباد ہائی کورٹ دے جج جسٹس انعام امین منہاس ایں اقدام کوں وقتی تے اہم قرار ݙیندیں آکھیا جو جدید مالیاتی جرائم توں موثر انداز اچ نبٹݨ کیتے عدلیہ دی مسلسل تربیت تے استعداد کار اچ ودھارا ناگزیر اے۔ تقریب دے چھیکڑ تے شریک ججاں اچ سنداں ونڈیاں ڳیاں جݙاں جو ڈپٹی چیئرمین نیب سہیل ناصر تے ڈی جی پاکستان اینٹی کرپشن اکیڈمی غلام صفدر شاہ مہمانِ خصوصی جسٹس انعام امین منہاس کوں یادگاری شیلڈ وی پیش کیتی۔ نیب موجب ایں تربیتی پروگرام دا مقصد منی لانڈرنگ تے مالیاتی بدعنوانی دے خلاف پاکستان دے ادارہ جاتی تے عدالتی نظام کوں مزید تکڑا بݨاوݨ اے۔