محکمہِ موسمیات دی پہاڑی علاقیں اچ لینڈ سلائیڈنگ تے مقامی ندی نالیں اچ طغیانی دے ݙر دی چتاوݨی

اسلام آباد۔2 جولائی (اے پی پی) محکمہِ موسمیات پہاڑی علاقیں اچ لینڈ سلائیڈنگ تے مقامی ندی نالیں اچ طغیانی دا ݙر ظاہر کرݙتے۔ محکمہِ موسمیات انتباہ جاری کیتے جو خمیس دی رات زور دے مینھ پاروں اُتلے خیبرپختونخوا، گلگت بلتستان، مری، گلیات تے کشمیر دے پہاڑی علاقیں اچ لینڈ سلائیڈنگ تے مقامی ندی نالیں اچ طغیانی دا ݙر اے ، ایں دوران ڈی جی خان تے شمال مشرقی بلوچستان دے پہاڑی برساتی نالیں اچ فلیش فلڈنگ  وی تھی سڳدی اے۔زور دا مینھ وسݨ پاروں اسلام آباد/راولپنڈی، پشاور، نوشہرہ، سیالکوٹ، نارووال، گوجرانوالہ، لاہور تے فیصل آباد اچ نشیبی علاقے زیرِ آب آوݨ دا ݙر اے، اندھاری/جھکڑ چلݨ تے آسمانی بجلی ڈھݨ پاروں کمزور تعمیرات (سولر پینلز، بجلی دے کھمبے، بل بورڈز وغیرہ) کوں ضیان پڄݨ دا ݙراے۔ محکمہِ موسمیات موجب موجودہ صورتحال پاروں مغربی ہوائیں دا سلسلہ ملک دے ٻہوں سارے علاقیں تے اثرانداز اے، بحیرۂ عرب تے خلیجِ بنگال توں مرطوب ہوائیں وی ملک اچ مسلسل داخل تھیندیاں پئن۔آندے 24 گھنٹے اچ کشمیر، خیبرپختونخوا، اسلام آباد، پنجاب، بلوچستان تے گلگت بلتستان اچ اندھاری/جھکڑ چلݨ تے کھمݨ گاجاں نال مینھ جݙاں جو کجھ جہیں تے زور دا مینھ وسݨ دا امکان اے ۔ ایں دوران سندھ دے اُتلے علاقیں اچ وی تکھی ہوا تے کھمݨ گاجاں نال مینھ وسݨ دی توقع اے ۔ جمعہ دے ݙینھ کشمیر، اتلے خیبرپختونخوا، شمال مشرقی پنجاب تے گلگت بلتستان اچ اندھاری/جھکڑ چلݨ تے کھمݨ گاجاں نال مینھ وسݨ دا امکان اے ٻئے علاقیں اچ موسم رکھا رہݨ دا امکان اے۔گزریل 24 گھنٹے دے دوران پنجاب، اسلام آباد، کشمیر، خیبرپختونخوا، شمال مشرقی بلوچستان تے گلگت بلتستان اچ اندھاری/جھکڑ چلݨ تے کھمݨ نال مینھ وسیا جݙاں جو ۔ ملک دے ٻئے علاقیں اچ موسم گرم تے مرطوب رہیا۔ ساریں توں ودھ مینھ پنجاب اچ مری 72، اسلام آباد (ایئرپورٹ 48، گولڑہ 39، بوکرا 14، سیدپور 12، سٹی 07)، منڈی بہاؤالدین 25، اٹک 22، لاہور (نشتر ٹاؤن 38، جوہر ٹاؤن 24، تاجپورہ 23، مغل پورہ، فرخ آباد 22، ہیڈ آفس واسا 20، ڈیفنس روڈ 16، ائیرپورٹ 14، سمن آباد 13، شادی پورہ 12، گلشنِ راوی 11، جیل روڈ، لکشمی چوک، اقبال ٹاؤن، سگیاں 10، سٹی 09، اپر مال 08، پاݨی آلا تالاب 07، چوک ناخدا 01)، حافظ آباد 14، شیخوپورہ 14، گوجرانوالہ 13، راولپنڈی (کچہری 12، کٹاریاں، پیرودھائی، چکلالہ 11، گوالمنڈی، شمس آباد 08)، گجرات 11، جہلم 08، قصور 07، منگلا 06، نورپور تھل، نارووال 03، چکوال، دیرہ غازی خان 02، جوہرآباد 01، سیالکوٹ ائیرپورٹ 01، کشمیر اچ مظفرآباد (ایئرپورٹ 15، سٹی 13)، گڑھی دوپٹہ 14، کوٹلی 03، خیبر پختونخوا اچ پاراچنار، مالم جبہ 10، بالاکوٹ 08، لوئر دیر 09، کاکول، دیرہ اسماعیل خان ائیرپورٹ 06، پٹن 04، سیدو شریف، چراٹ 01، بلوچستان اچ خضدار 08، بارکھان 07، چمن 04، قلات 01، گلگت بلتستان اچ استور اچ 02 ملی میٹر مینھ ریکارڈ کیتا ڳئے ۔خمیس کوں ریکارڈ کیتے ڳئے ودھ توں ودھ درجہ حرارت دالبندین 46، نوکنڈی 45، سبی تے دادو اچ 44 ڈگری سینٹی گریڈ ریکارڈ کیتا ڳیا۔