ٹیکس نیٹ اچ توسیع، شفافیت تے ٹیکس دہندگان کوں سہولتاں ݙیوݨ ایف بی آر اصلاحات دی اولین ترجیحات، ایف بی آر اچ کرپٹ عناصر دی کوئی جاہ کائنی، وزیرِاعظم شہباز شریف

اسلام آباد۔2 جولائی (اے پی پی) وزیرِاعظم محمد شہباز شریف مالی سال 2025-26 کیتے تاریخی ریونیو ہدف دے حصول کوں سنگِ میل قرار ݙیندیں آکھیے جو ٹیکس نیٹ اچ توسیع، شفافیت تے ٹیکس دہندگان کوں سہولتاں ݙیوݨ ایف بی آر اصلاحات دی اولین ترجیحات ہن، گزریل ݙھائی سالاں توں جاری اصلاحات، ڈیجیٹائزیشن تے ٹیم ورک دی بدولت ایف بی آر ریکارڈ ٹیکس اکھٹا کرݨ اچ کامیاب تھئی۔ مالی سال 2025-26 اچ تقریباً 600 ارب روپے دے ٹیکس ریفنڈز دی وقتی ادائیگی توں کاروباری برادری کوں سہولت تے برآمدات دے ودھارے اچ مدد ملی، ریونیو اکٹھا کرݨ دے نال نال ٹیکس دہندگان، کاروباری و صنعتی برادری کوں سہولتاں ݙیوݨ ترجیح ہووݨی چاہیدی اے، ایف بی آر اچ کرپٹ عناصر دی کوئی جاہ کائنی۔وزیرِاعظم دفتر دے میڈیا ونگ توں جاری بیان موجب انھاں اے ڳالھ فیڈرل بورڈ آف ریونیو دے سینئر افسراں کوں آکھی جنھاں وزیرِاعظم نال اتھاں ملاقات کیتی۔ وزیرِاعظم پچھلے مالی سال اچ 12.957 کھرب روپے دے محصولات دا ہدف عبور کرݨ تے ایف بی آر دے افسراں دی تعریف کیتی۔ وزیرِاعظم آکھیا جو مالی سال 2025-26 کیتے تاریخی ریونیو ہدف حاصل کرݨ ہک سنگِ میل اے، ساریں کوں فرداً فرداً تے ایف بی آر دے سارے عملے کوں اجتماعی طور تے مبارخ ݙینداں۔ وزیرِ اعظم آکھیا جو ایف بی آر دیاں فیلڈ فارمیشنز تے افسران ایں ہی جذبے نال کم کریندیں اڄوکے مالی سال 15 کھرب روپے توں ودھ محصولات دا ہدف حاصل کریسن۔نمایاں کارکردگی تے وزیرِاعظم نائب وزیرِاعظم تے وزیرِ خارجہ سینیٹر محمد اسحاق ڈار، وزیرِ خزانہ و محصولات محمد اورنگزیب، وزیرِ مملکت خزانہ و ریلوے بلال اظہر کیانی، اٹارنی جنرل منصور اعوان، چیئرمین ایف بی آر راشد لنگڑیال، سیکرٹری خزانہ امداد اللہ بوسال، معاشی ٹیم دے ٻئے ارکان تے ایف بی آر افسران دی کارکردگی دی تعریف کیتی۔ وزیرِاعظم فیلڈ مارشل سید عاصم منیر تے قانون نافذ کرݨ آلے اداریں کوں سمگلنگ روکݨ تے افسران کوں سکیورٹی ݙیوݨ تے خراجِ تحسین پیش کیتا۔ وزیرِاعظم آکھیا جو جنھاں افسران ملک دے پرے دے علاقیں اچ اپݨی جاناں تے کھیݙ تے ٹیکس تے کسٹم ڈیوٹی دے نفاذ اچ اپݨا کردار نبھائے، انھاں دیاں کوششاں لائقِ تحسین ہن۔وزیرِ اعظم آکھیا جو ایف بی آر دے امور تے مہینے اچ ݙو واری جائزہ اجلاساں دی صدارت میں خود کیتی کیوں جو ایف بی آر اچ اصلاحات حکومت دا اولین ایجنڈا اے، اساں ایف بی آر دی فیلڈ فارمیشنز اچ چنڳی شہرت دے حامل افسران دی تعیناتی یقینی بݨائی۔ انھاں آکھیا جو ایف بی آر دا نواں آپریٹنگ ماڈل ہک ڈیجیٹل تے گھٹ توں گھٹ انسانی مداخلت تے مبنی فیس لیس ٹیکس نظام تے مبنی ہوسی۔ وزیراعظم پاکستان کسٹمز سروس تے ان لینڈ ریونیو سروس دے افسران دی ترقی تے سروس کوں مزید بہتر بݨاوݨ کیتے اعلیٰ سطح دی کمیٹی تشکیل ݙیوݨ دی ہدایت کیتی۔افسران دے وفد ایف بی آر تے خصوصی توجہ مرکوز کرݨ تے کارکردگی دی تعریف کرݨ تے وزیرِ اعظم دا شکریہ ادا کیتا۔ وفد دے شرکاء وزیرِاعظم کوں ملک دے مختلف علاقیں دی فیلڈ فارمیشنز دی کارکردگی دا ݙسایا ۔ وزیرِاعظم کوں ݙسایا ڳیا جو کراچی لارج ٹیکس پیئر یونٹ جون 2026ء دے دوران 528 ارب روپے دا ریونیو اکٹھا کیتا، لاہور لارج ٹیکس پیئر یونٹ جون 2026ء دے دوران 261 ارب روپے کٹھے کیتے، گزریل ہک سال دے دوران ائیرپورٹ تے کسٹم ڈیوٹی دے حجم اچ 21 فیصد ودھارا تھیا۔