چیئرمین سینیٹ سید یوسف رضا گیلانی آیت اللہ سید علی خامنہ ای دی آخری رسومات اچ شرکت کیتے تہران روانہ

اسلام آباد۔2 جولائی (اے پی پی) چیئرمین سینیٹ سید یوسف رضا گیلانی ایرانی پارلیمان دے سپیکر محمد باقر قالیباف دی دعوت تے 3 جولائی 2026ء کوں تہران اچ منعقد تھیوݨ آلی مرحوم آیت اللہ سید علی خامنہ ای دی سرکاری آخری رسومات اچ شرکت کیتے ایران روانہ تھی ڳئن۔ گورنرخیبر پختونخوا فیصل کریم کنڈی وی چیئرمین سینیٹ دے رَلے ہن۔سینیٹ سیکرٹریٹ موجب چیئرمین سینیٹ آیت اللہ سید علی خامنہ ای دے انتقال تے ݙکھ تے افسوس کریندیں آکھیا جو سینیٹ پاکستان تے اپݨے پاسوں ایرانی پارلیمان، حکومت تے ایران دی عوام توں دلی تعزیت تے ہمدردی دا اظہار کریندن۔ چیئرمین سینیٹ آکھیا جو مرحوم آیت اللہ سید علی خامنہ ای غیر معمولی بصیرت، دانشمندی تے قائدانہ صلاحیتاں دے حامل رہنما ہن جنھاں اپݨے ملک دی عزت و وقار دے نال رہنمائی کیتی۔ انھاں آکھیا جو انھاں دے انتقال توں نہ صرف ایران ہک عظیم رہنما توں محروم تھئے بلکہ پاکستان ہک مخلص دوست تے پوری مسلم امہ ہک دور اندیش قائد ونڄا ݙتے۔ سید یوسف رضا گیلانی آکھیا جو آیت اللہ سید علی خامنہ ای دی خدمات، قیادت تے مسلم دنیا کیتے انھاں دا کردار ہمیشہ یاد رکھیا ویسے۔ انھاں دعا کیتی جو اللہ تعالیٰ مرحوم دے درجات بلند فرماوے تے ایرانی عوام کوں اے ݙکھ برداشت کرݨ دی توفیق عطا کرے۔