حکومت بنیادی صحت دی سہولیات اچ موجود خلا کوں پُر کرݨ کیتے عملی اقدامات کریندی پئی اے، وفاقی وزیرِ صحت

اسلام آباد۔3 جولائی (اے پی پی) وفاقی وزیر برائے قومی صحت سید مصطفیٰ کمال آکھیا اے جو وفاقی حکومت ایں عزم دا اعادہ کیتا جو پاکستان اچ صحت دے نظام دی بہتری کیتے بنیادی صحت دے مراکز کوں مضبوط بݨاوݨ اولین ترجیح اے کیونجو موجودہ نظام اچ اصل ڳھٹکی ایں سطح تے پاتی ویندی اے۔ آپݨے ہک بیان اچ انھاں آکھیا جو حکومت ایں حقیقت توں بخوبی آگاہ اے جو ملک اچ صحت دا نظام ایں انداز اچ کم نہیں کریندا پیا جئیں انداز اچ ایں کوں کرݨا چاہیدا ہئی۔ خاص طور تے بنیادی صحت دی سہولیات اچ موجود خلا دے باعث عوام براہِ راست وݙے اتے تریجھے درجے دے ہسپتالاں دا رخ کریندن، جئیں نال اے ادارے غیر لوڑھے بوجھ دا شکار تھی ویندن۔ انھاں آکھیا جو تریجھے درجے دے ہسپتالاں اچ آوݨ آلے تقریباً 70 فیصد مریض ایجھے ہوندن جنھاں دا علاج بنیادی یا ثانوی سطح تے ممکن ہئی، مگر گھراں توں ہسپتال تائیں دے پندھ اچ مناسب سہولت نہ ہووݨ دے باعث او وݙے ہسپتالاں تئیں پڄ ویندن۔ ایں صورتحال دے ذمہ دار عوام نئی بلکہ نظام اچ موجود او خلا اے جئیں کوں حکومت پُر کرݨ کیتے عملی اقدامات کریندی پئی اے۔ انھاں آکھیا جو جدید ٹیکنالوجی تے ڈیجیٹائزیشن دے ذریعے ایں خلا کوں گھٹ کیتا ونڄ سڳدے۔ کورونا وبا دے دوران ٹیلی میڈیسن دی افادیت دنیا بھر اچ ثابت تھئی۔ ایں تناظر اچ وفاقی حکومت 10 بنیادی صحت مراکز اچ ٹیلی میڈیسن دا پائلٹ منصوبہ شروع کیتے، جنھاں اچوں 6 اسلام آباد تے 4 کراچی اچ قائم کیتے ڳئن۔ انھاں ݙسایا جو اِنھاں مراکز اچ مقامی عملے کوں تربیت ݙے تے انھاں کوں آن لائن ماہر ڈاکٹراں نال منسلک کیتا ڳئے تانجو مریضاں کوں ماہر طبی رائے فراہم کیتی جا سڳے۔ ایں نظام دے تحت بیرونِ ملک مقیم پاکستانی ڈاکٹرز وی خدمات انجام ݙیندے پئن۔ ہک موقعے تے دور دراز علاقے دی مریضہ دا معائنہ قطر (دوحہ) اچ موجود خاتون ڈاکٹر آن لائن کیتا، جیہڑا ایں نظام دی مؤثریت دا عملی ثبوت اے۔انھاں افسوس دا اظہار کریندیں ہوئیں آکھیا جو پاکستان اچ ہر سال تقریباً 11 ہزار ماؤاں دورانِ حمل یا زچگی جان دی بازی ہار ویندن، جیہڑا ہک انتہائی سنگین مسئلہ اے۔ ہر 10 ہزار زچگیاں اچ تقریباً 400 اموات دا تناسب کہیں وی مہذب معاشرے کیتے قابلِ قبول نئی۔  انھاں ایں عزم دا اعادہ کیتا جو حکومت بنیادی صحت دے نظام دی بہتری، مؤثر ویکسی نیشن، ماں تے ٻال دی صحت دے تحفظ تے جدید ٹیکنالوجی دے استعمال دے ذریعے صحت دے شعبے اچ دیرپا اصلاحات کیتے پرعزم اے اتے دانشوراں، ماہرین تے پالیسی سازاں دی مشاورت نال ایں مشن کوں اڳوں ودھایا ویسے۔