وزیرِ اعظم شہباز شریف دی ملک بھر اچ غیر معیاری سرنجز دی تیاری تے استعمال تے مکمل پابندی لاوݨ دی ہدایت

اسلام آباد۔3 جولائی (اے پی پی) وزیرِ اعظم محمد شہباز شریف متعدی بیماریاں دے پھیلاؤ دے فوری سدِ باب کیتے ملک بھر اچ غیر معیاری سرنجز دی تیاری تے استعمال تے مکمل پابندی لاوݨ تے مجرمانہ غفلت دے مرتکب افراد تے ہسپتالاں دے خلاف قانونی کارروائی دی ہدایت کیتی اے۔ وزیرِ اعظم آفس دے میڈیا ونگ ولوں جاری کیتے ڳئے بیان دے مطابق وزیرِ اعظم شہباز شریف دی صدارت ایڈز تے ہیپاٹائٹس دی متعدی بیماریاں دی روک تھام کیتے چاتے ڳئے اقدامات تے جائزہ اجلاس جمعے کوں تھیا۔ اجلاس اچ وفاقی وزیرِ قانون اعظم نذیر تارڑ، وزیرِ مملکت برائے صحت ڈاکٹر مختار احمد بھرتھ، اٹارنی جنرل آف پاکستان منصور اعوان، گلوبل فنڈ دی نمائندہ Izaskun Gaviria، پبلک ہیلتھ دے ماہرین، وزارتِ قومی صحت، ڈریپ دے نمائندیاں تے اعلیٰ سرکاری حکام شرکت کیتی۔ وزیرِ اعظم اجلاس توں خطاب کریندیں ہوئیں ہدایت کیتی جو متعدی بیماریاں دے پھیلاؤ دے فوری سدِ باب کیتے ملک بھر اچ غیر معیاری سرنجز دی تیاری تے استعمال تے مکمل پابندی لاتی ونڄے۔ انھاں خلافِ ضابطہ سرنجز دے استعمال اچ ملوث یا ایں دی روک تھام اچ مجرمانہ غفلت دے مرتکب افراد تے ہسپتالاں دے خلاف قانونی کارروائی کرݨ تے متعدی بیماریاں تے قابو پاوݨ کیتے ماہرین دی خصوصی کمیٹی تشکیل ݙیوݨ دی ہدایت کریندیں ہوئیں آکھیا جو کمیٹی آپݨی سفارشات مرتب کریندے ویلھے صوبیاں توں مشاورت یقینی بݨاوے۔ وزیرِ اعظم وزارتِ قانون تے متعلقہ اداریاں دے نال رل تے قانونی تے ریگولیٹری فریم ورک اچ ضروری ترامیم تجویز کرݨ دی وی ہدایت کیتی۔ انھاں آکھیا جو قومی سطح تے جامع حکمتِ عملی دی تشکیل تے مؤثر نفاذ ایں مسئلے دا حل اے، سرنجز توں متعدی بیماریاں دے پھیلݨ دے مستقل سدِ باب کیتے ڈریپ میڈیکل آلات دی انڈسٹری نال مشاورت کر تے پالیسی اقدامات تجویز کرے۔ وزیرِ اعظم آکھیا جو متعدی بیماریاں دے پھیلاؤ دے سدِ باب دی جاری کوششاں اچ بین الاقوامی شراکت داراں دی معاونت انتہائی اہم اے، علاج توں متعلقہ آلات دی مینوفیکچرنگ تے شعبہِ صحت دے عملے دی عالمی معیار دی ٹریننگ تے وی خصوصی توجہ ݙیوݨ دی لوڑھ اے۔ اجلاس اچ وزیرِ اعظم دی ہدایت تے قائم کیتی ڳئی خصوصی ٹاسک فورس تے وزارتِ قومی صحت ولوں متعدی بیماریاں دے پھیلاؤ دے سدِ باب کیتے چاتے ڳئے اقدامات تے بریفنگ ݙتی ڳئی۔