دانہ سر اچ افسوسناک بس حادثے اچ 40 مسافر جاں بحق، 8 زخمی

کوئٹہ۔ 3 جولائی (اے پی پی) وزیرِ اعلیٰ بلوچستان دے معاون برائے سیاسی تےمیڈیا امور شاہد رند بلوچستان تے خیبرپختونخوا دے سرحدی علاقے دانہ سر اچ پیش آوݨ آلے الماناک مسافر بس حادثے تے ݙکھ تے افسوس دا اظہار کریندیں ہوئیں آکھیا جو ابتدائی اطلاعات دے مطابق حادثے اچ ہݨ تائیں 40 افراد جاں بحق جڈانجو8 افراد زخمی تھئن۔ شاہد رند آکھیا جو حادثے دی اطلاع ملدیں ای وزیرِ اعلیٰ بلوچستان میر سرفراز بگٹی دی ہدایت تے انھاں دے سٹاف افسر سید امین بلوچستان تے خیبرپختونخوا دے متعلقہ اضلاع دی ضلعی انتظامیہ نال فوری رابطہ قائم کیتا، جئیں دے بعد ریسکیو تے امدادی کارروائیاں دا آغاز کر ݙتا ڳیا۔ ݙوہائیں صوبیاں دی ضلعی انتظامیہ، ریسکیو ادارے تے متعلقہ محکمے متاثرہ افراد دی مدد تے زخمیاں کوں فوری طبی امداد دی فراہمی اچ مصروف ہن۔ انھاں آکھیا جو ابتدائی معلومات دے مطابق کوئٹہ توں پشاور ونڄݨ آلی حادثے دا شکار بس اچ آپݨے مسافراں دے علاوہ ہک خراب تھیوݨ آلی ٻئی بس دے مسافر وی سوار ہن، جئیں پاروں ڳاݙی اچ معمول توں ودھ افراد موجود ہن۔ وزیرِ اعلیٰ بلوچستان دے معاون آکھیا جو ضلعی انتظامیہ تے متعلقہ افسران حادثے دیاں وجوہات دا تفصیلی جائزہ گھندے پئن، جڈانجو جاں بحق افراد دی سنجاݨ، زخمیاں دے علاج تے متاثرہ خانداناں دی ہر ممکن معاونت کوں یقینی بݨایا ویندا پئے۔ شاہد رند آکھیا جو حکومتِ بلوچستان ایں الماناک سانحے تے جاں بحق افراد دے لواحقین دے ݙکھ اچ برابر دی شریک اے اتے انھاں توں دلی تعزیت تے ہمدردی دا اظہار کریندی اے۔ انھاں زخمیاں دی جلد صحت یابی کیتے دعا کریندیں ہوئیں آکھیا جو حکومت متاثرہ خانداناں کوں ہر ممکن معاونت فراہم کریسی اتے حادثے دی مکمل تحقیقات دے بعد حقائق عوام دے سامݨے آندے ویسن۔