ٹیکسیشن کیتے نظام کوں ڈیجیٹلائز کیتا ویندا پئے،وزیر خزانہ محمد اورنگزیب

فیصل آباد۔ 03 جولائی (اے پی پی) وفاقی وزیرِ خزانہ و محصولات سینیٹر محمد اورنگزیب آکھیے جو ٹیکسیشن کیتے نظام کوں ڈیجیٹلائز کیتا ویندا پئے جیں نال نہ صرف لیکیج دا خاتمہ تھیسی بلکہ محاصل دی وصولی وی ودھسی۔ او فیصل آباد چیمبر آف کامرس اینڈ انڈسٹری اچ بزنس کمیونٹی دے نمائندہ اجلاس توں خطاب کریندے پئے ہن۔ انھاں آکھیا جو اڄ دا اے اجلاس پوسٹ بجٹ میٹنگ نئی بلکہ اے آندے مالی سال دے بجٹ دی شروعات ہن تے ایں دا آغاز فیصل آباد چیمبر توں کیتا ویندا پئے۔ انھاں آکھیا جو بجٹ دی تیاری ہݨ فنانس ڈویژن کنے ہے جݙاں جو ایف بی آر صرف ٹیکس ایڈمنسٹریشن تے ٹیکس وصولیاں توں متعلقہ مسئلے ݙیکھسی۔ انھاں آکھیا جو معاشی ترقی کیتے نجی شعبے کوں لیڈ کرݨا اے۔فنانسنگ دے حوالے نال انھاں آکھیا جو شرحِ سود 22 فیصد توں گھٹ کرتے 11.5 فیصد کر ݙتی ڳئی اے۔ بجلی دے ٹیرف دے حوالے نال انھاں آکھیا جو کراس سبسڈیز ختم کر ݙتیاں ڳئن جیں نال بجلی دے ریٹ مزید گھٹ تھیسن۔ ٹیکسیشن دا ذکر کریندیں وفاقی وزیر آکھیا جو ایں تے 2 سالاں توں ڳالھ جاری ہئی جیں دے نتیجے اچ ایڈوانس تے سپر ٹیکس ختم کر ݙتا ڳئے۔ انھاں آئی ٹی دے شعبے دی کارکردگی دی تعریف کیتی تے آکھیا جو ایں 4.5 ارب دی برآمدات کیتیاں۔ حکومت انھاں کیتے مزید سازگار ماحول ݙیندی پئی اے۔ انھاں آکھیا جو حکومت تعمیرات دے شعبے دی حوصلہ افزائی کریسی مگر فائلاں دے کاروبار کیتے کوئی سہولت نہ ملسی۔ آٹومیشن دے حوالے نال وفاقی وزیر آکھیا جو ہر شخص دا مکمل ریکارڈ نادرا تے ایف بی آر کنے موجود اے جیں کوں آپت اچ جوڑ ݙتا ویسے۔ ایں نال لیکیج کوں ختم کرݨ اچ مدد ملسی۔ انھاں آکھیا جو ڈیجیٹلائزیشن دا عمل شوگر سیکٹر توں شروع کیتا ڳیا جیں نال 60 ارب دا اضافی سیلز ٹیکس ملیا۔انھاں آکھیا جو ایس ایم سی سیکٹر کیتے میڈیم ٹرم ٹیکس حکمتِ عملی متعارف کرائی ویسے جیں نال ٹیرف رجیم اچ کمی تھیسی۔ ایویں زرعی مشینری تے ریگولیٹری ڈیوٹی تے ایڈوانس ٹیکس کوں صفرکر ݙتا ڳئے۔ آبادی دے ودھدے دٻاؤ تے قابو پاوݨ کیتے انھاں آکھیا جو چیمبرز تے بزنس کمیونٹی کوں وی ایں سلسلے اچ اپݨا کردار ادا کرݨا ہوسی۔ انھاں آکھیا جو ایران دا مسئلہ حل تھیوݨ نال علاقائی تجارت تے مثبت اثرات مرتب ہوسن۔ ایویں طرح او امریکہ توں وی ٹیرف اچ مزید مراعات گھنݨ دیاں کوششاں کریندے پئن جیں نال اِنھاں ملکاں کوں برآمدات ودھاوݨ اچ مدد ملسی۔ انھاں آکھیا جو قومی سلامتی تے کوئی سمجھوتہ نہ ہوسی۔ تانجو نیشنل ٹیرف کمیشن دے ایم ڈی نال ڳالھ کرتے اینٹی ڈمپنگ ڈیوٹی دے نفاذ دا جائزہ ڳھدا ویسے تے ایں سلسلے اچ سارے متعلقین دے نال نال فیصل آباد چیمبر دے نمائندیں کوں وی شامل کیتا ویسے۔ انھاں آکھیا جو ایس ایم ای سیکٹر کیتے انڄ رقم مختص کیتی ویسے تاں جو اے شعبہ تکھے ترقی کرسڳے۔ایں توں پہلے وفاقی وزیرِخزانہ سینیٹر محمد اورنگزیب دا خیر مقدم کیتا۔