اندھاری گھُلݨ تے آسمانی بجلی ڈھݨ پاروں کمزور تعمیرات کوں ضیان تھیوݨ دا ݙر اے، محکمہ موسمیات دی چتاوݨی

اسلام آباد۔3 جولائی (اے پی پی) محکمہ موسمیات چتاوݨی ݙتی اے جو اندھاری گھلݨ تے آسمانی بجلی ڈھݨ پاروں کمزور تعمیرات (سولر پینلز، بجلی دے کھمبے، بل بورڈز کوں ضیان تھیوݨ دا ݙر اے ۔محکمہ موسمیات موجب موجودہ صورتحال پاروں مغربی ہوائیں دا سلسلہ ملک دے مغربی تے اُتلے علاقیں تے اثر انداز تھیندا پئے۔ بحیرہِ عرب توں مرطوب ہوائیں مسلسل ملک دے اتلے تے وسطی علاقیں اچ داخل تھیندیاں پئن۔آندے 24 گھنٹے دے دوران کشمیر، خیبرپختونخوا، پنجاب تے گلگت بلتستان اچ زور دی ہوا تے کھمݨ گاجاں نال مینھ وسݨ دا امکان اے ۔ ملک دیاں ٻیاں جہیں تے موسم گرم رہݨ دی توقع اے ۔چھݨ چھݨ کوں ملک دے ٻہوں سارے علاقیں اچ موسم گرم تے مرطوب رہݨ دی توقع اے تاں جو کشمیر، اُتلے خیبرپختونخوا تے شمال مشرقی پنجاب اچ زور دی ہوا تے کھمݨ گاجاں نال مینھ دا امکان اے ۔ گزریل 24 گھنٹے دے دوران ملک دے ٻہوں سارے علاقیں اچ موسم گرم تے تتا ریہا جݙاں جو خیبرپختونخوا، پنجاب تے بلوچستان اچ اندھاری گھلی تے کھمݨ گاجاں نال مینھ وٹھا۔ ساریں توں ودھ مینھ خیبرپختونخوا اچ مالم جبہ 16، پاراچنار 14، چراٹ 09، دروش 03، دیر، میر کھانی، کالام، پشاور ائیرپورٹ 01، پنجاب اچ اٹک 10، نور پور تھل 05، جھنگ 02، بلوچستان اچ بارکھان 07، لسبیلہ 06، خضدار اچ 02 ملی میٹر مینھ ریکارڈ تھئے۔ جمعہ دے ݙینھ ریکارڈ کیتا ڳیا ودھ توں ودھ درجہ حرارت نوکنڈی 45، دالبندین، جیکب آباد تے دادو اچ 44 ڈگری سینٹی گریڈ ریکارڈ کیتا ڳئے۔