ایمرجنسی رسپانس کمیٹی دی سارے صوبیں دے چیف سیکرٹریز کوں ایمرجنسی رسپانس کمیٹی اچ بطور شریک ارکان رَلاوݨ دی منظوری

اسلام آباد۔3 جولائی (اے پی پی) وزیرِاعظم دی ہدایات تے بݨی ایمرجنسی رسپانس کمیٹی سارے صوبیں دے چیف سیکرٹریز کوں ایمرجنسی رسپانس کمیٹی اچ بطور شریک ارکان شامل کرݨ دی منظوری ݙے ݙتی اے۔ این ڈی ایم اے دے میڈیا ونگ توں جاری کیتے ڳئے بیان موجب وزیرِاعظم دی ہدایات تے بݨی ایمرجنسی رسپانس کمیٹی دا پہلا اجلاس این ڈی ایم اے ہیڈکوارٹرز اسلام آباد اچ تھیا۔ وفاقی وزیرمنصوبہ بندی، ترقی، اصلاحات و خصوصی اقدامات پروفیسر احسن اقبال ویڈیو لنک دے ذریعے اجلاس دی صدارت کیتی۔وفاقی وزیرِموسمیاتی تبدیلی مصدق ملک، چیئرمین این ڈی ایم اے لیفٹیننٹ جنرل انعام حیدر ملک تے متعلقہ وفاقی اداریں دے نمائندگان اجلاس اچ شرکت کیتی۔ اجلاس اچ ایمرجنسی رسپانس کمیٹی ساوݨ 2026 دے دوران قومی تیاریاں تے ہنگامی ردعمل دا جائزہ ڳھدا۔ وزیرِاعظم دفتر دے نوٹیفکیشن موجب این ڈی ایم اے ایمرجنسی رسپانس کمیٹی دے سیکرٹریٹ دے فرائض انجام ݙیسی۔ کمیٹی دے پہلے اجلاس دے دوران این ڈی ایم اے دے پاسوں ساوݨ 2026، متوقع موسمی خطرات تے قومی تیاریاں تے جامع بریفنگ ݙتی ڳئی۔ اجلاس اچ ساوݨ دے دوران قومی سطح تے مؤثر رابطہ کاری تے وقتی ردعمل دے نظام دا جائزہ ڳھدا ڳیا۔ سارے صوبیاں دے چیف سیکریٹریز کوں ایمرجنسی رسپانس کمیٹی اچ بطور شریک ارکان رَلاوݨ دی منظوری ݙے ݙتی ڳئی۔ اجلاس اچ پیشگی منصوبہ بندی، وقتی اقدامات تے اداریں وچال مؤثر ہم آہنگی دی لوڑھ تے زور ݙتا ڳیا۔ اجلاس اچ ساوݨ دے قومی زرعی اجناس تے آبی ذخیرے تے اثرات دا وی جائزہ ڳھدا ڳیا۔ قومی کمیٹی ساوݨ 2026 دے دوران جان و مال تے قومی انفراسٹرکچر دے تحفظ کیتے مربوط قومی حکمتِ عملی دے عزم دا اعادہ کیتا۔