وزیرِاعظم شہباز شریف دی پاکستانی وفد دے رلے آیت اللہ خامنہ ای شہید دے جنازے اچ شرکت

تہران۔3 جولائی (اے پی پی) وزیرِاعظم محمد شہباز شریف ایران دے صدر ڈاکٹر مسعود پزشکیان دی دعوت تے ایران دے شہید سپریم لیڈر آیت اللہ سید علی خامنہ ای دے جنازے اچ شرکت کیتی۔ نائب وزیرِ اعظم تے وزیرِخارجہ اسحاق ڈار، چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر، وفاقی وزیرِ داخلہ سید محسن نقوی، وفاقی وزیرِاطلاعات عطاء اللہ تارڑ، چیئرمین پاکستان پیپلز پارٹی بلاول بھٹو زرداری تے ٻئے اعلیٰ حکومتی حکام وی وزیرِاعظم دے رلے ہن۔ ایران دے سپریم لیڈر 28 فروری 2026 کوں ایران تے تھیوݨ آلے حملیں دے دوران جامِ شہادت نوش کرڳئے ہن۔ وزیرِاعظم دفتر دے میڈیا ونگ توں جاری بیان موجب وزیرِاعظم اسلام کیتے شہید سپریم لیڈر دی خدمات کوں خراجِ عقیدت پیش کریندیں آکھیا جو انھاں کئی ݙھاکیں تئیں غیرمعمولی بصیرت، حکمت تے دوراندیشی نال ایرانی قوم دی رہنمائی کیتی۔ وزیرِاعظم سپریم لیڈر، آیت اللہ سید مجتبیٰ حسینی خامنہ ای، صدرڈاکٹر مسعود پزشکیان تے ایران دے بھرا عوام دے نال ایں قومی سانحے تے مکمل یکجہتی دا اظہار کیتا تے شہید رہنما دے درجات دی بلندی تے مغفرت کیتے دعا کیتی۔ سینیٹ چیئرمین سید یوسف رضا گیلانی تے سپیکر قومی اسمبلی سردار ایاز صادق دی قیادت اچ پارلیمانی وفد، ارکانِ پارلیمان تے وزیرِاعلیٰ سندھ سید مراد علی شاہ وی وزیرِاعظم دے رلے جنازے اچ شرکت کیتی۔ جنازے اچ شرکت دے بعد وزیرِاعظم ترکیہ دے سرکاری دورے تے استنبول روانہ تھی ڳئن۔