اسلام آباد پولیس اچ 1712 اسامیاں تے بھرتیاں جاری ہن، میرٹ بھرتیاں کیتے انتخاب دا واحد معیار ہوسی، محسن نقوی

اسلام آباد۔4 جولائی (اے پی پی) وفاقی وزیرِ داخلہ محسن نقوی آکھیا جو اسلام آباد پولیس اچ 1712 اسامیاں تے بھرتیاں جاری ہن، میرٹ بھرتیاں کیتے انتخاب دا واحد معیار ہوسی۔ ہفتے کوں سوشل میڈیا ایکس تے اسلام آباد پولیس اچ بھرتیاں دا اشتہار شیئر کریندیں ہوئیں وفاقی وزیرِ داخلہ محسن نقوی آکھیا جو پاکستان دے نوجوان چھوہر تے چھوریں کیتے ہک طویل انتظار دے بعد سنہری موقع آ ڳئے اتے اسلام آباد پولیس اچ 1,712 اسامیاں تے بھرتیاں جاری ہن۔ اگر تساں پاکستان دی خدمت، عزت، بہادری تے دیانت داری دے نال کرݨ دا جذبہ رکھیندوں تاں اے تہاݙے کیتے بہترین موقع اے۔ پاکستان دے کہیں وی صوبے، علاقے یا خطے نال تعلق رکھݨ آلے امیدوار درخواست ݙے سڳدن۔ بھرتی دے ٹیسٹ تہاݙے قریبی علاقیاں اچ کیتے ویسن۔ درخواست جمع کراوݨ اچ صرف 4 ݙین٘ہ باقی ہن، ایں کیتے ایں موقعے کوں ہرگز ضائع نہ کرو۔ انھاں واضح طور تے آکھیا جو انھاں بھرتیاں کیتے میرٹ انتخاب دا واحد معیار ہوسی۔ بھرتی دے عمل تے اثر انداز تھیوݨ یا کہیں وی قسم دی سفارش یا دباؤ پاوݨ دی کوشش کرݨ آلے امیدوار کوں فوری طور تے نااہل قرار ݙے ݙتا ویسی۔ انھاں آکھیا جو اسلام آباد پولیس دا حصہ بݨو، پاکستان دی خدمت فخر دے نال کرو۔ انھاں آکھیا جو npftas.pk تے آن لائن درخواست ݙیو۔