چیئرمین سینیٹ سید یوسف رضا گیلانی دی سپیکر ایرانی پارلیمنٹ ڈاکٹر محمد باقر قالیباف نال ملاقات

تہران۔4 جولائی (اے پی پی) چیئرمین سینیٹ پاکستان، سید یوسف رضا گیلانی تہران اچ اسلامی مشاورتی اسمبلی (ایرانی پارلیمنٹ) دے سپیکر ڈاکٹر محمد باقر قالیباف نال ملاقات کیتی جئیں اچ پاکستان تے ایران دے برادرانہ تعلقات، ݙوپاسہ تعاون، علاقائی امن و استحکام، امتِ مسلمہ کوں درپیش چیلنجز تے عالمی امن دے فروغ سمیت آپسی دلچسپی دے مختلف معاملیاں تے تفصیلی ڳالھ کیتی ڳئی۔ ایں موقعے تے چیئرمین سینیٹ سپریم لیڈر دی شہادت تے ایرانی حکومت، پارلیمنٹ تے عوام توں دلی تعزیت تے ہمدردی دا اظہار کریندیں ہوئیں آکھیا جو پاکستان ایں ݙکھ دی گھڑی اچ آپݨے برادر ملک ایران دے نال کھڑے۔ انھاں آکھیا جو امن، استحکام تے ترقی پورے خطے دی خوشحالی کیتے نہایت اہم اے۔ سید یوسف رضا گیلانی آکھیا جو پاکستان تے ایران تاریخی، مذہبی، ثقافتی تے برادرانہ رشتیاں اچ ٻدھے ہوئے ہن، جنھاں کوں مزید مضبوط بݨاوݨ تے مشترکہ توجہ مرکوز کرݨ دی لوڑھ اے۔ انھاں ݙوہائیں ملکاں وچال پارلیمانی روابط، اقتصادی تعاون، تجارت تے عوامی سطح تے روابط کوں مزید وسعت ݙیوݨ دی اہمیت تے وی زور ݙتا۔ ایں موقعے تے اسپیکر ایرانی پارلیمنٹ ڈاکٹر محمد باقر قالیباف مشکل وقت اچ پاکستان ولوں اظہارِ یکجہتی تے تعاون کوں سراہندیں ہوئیں آکھیا جو پاکستان ہمیشہ آزمائش دی گھڑی اچ ایران دا مخلص تے حقیقی دوست ثابت تھیے۔ انھاں آکھیا جو ایرانی عوام تے قیادت پاکستان تے ایں دے عوام کوں انتہائی قدر تے احترام دی نگاہ نال ݙیکھدن اتے ݙوہائیں ملکاں وچال دیریںہ تعلقات آپسی اعتماد تے اخوت تے استوار ہن۔ ملاقات اچ ایں عزم دا اعادہ کیتا ڳیا جو پاکستان تے ایران آپسی تعاون کوں مزید فروغ ݙیندیں ہوئیں خطے اچ امن، استحکام، ترقی تے عالمی سطح تے مثبت کردار کیتے مشترکہ کوششاں جاری رکھیسن۔